Azərbaycanda oğurluqların azalmasının ŞOK SƏBƏBLƏRİ - Lent.az ARAŞDIRDI

“Bu ilin yanvar-noyabr aylarında mülkiyyət əleyhinə cinayətlər sırasında oğurluq hadisələri 542 fakt azalıb”.

Bu barədə Lent.az-a Daxili İşlər Nazirliyinin mətbuat xidmətindən bildirilib.

Qeyd olunur ki, mülkiyyət əleyhinə cinayətlər üzrə - xüsusi əmlak üzrə oğurluqları 518, əl çantasından oğurluqlar (cibgirlik) 47, mobil telefon oğurluğu 157, mənzil və şəxsi evlərdən oğurluqlar üzrə 283 fakt azalma müşahidə olunub.

Nazirlikdən bildirilib ki, bu, ötən illə müqayisədə cinayətlərin ümumi indeksində yaxşıya doğru müsbət dinamikadır. Bu da onu göstərir ki, ölkəmizdə həyata keçirilən effektiv hüquq-mühafizə tədbirləri nəticəsiz qalmayıb.

Cinayətlərin açılma faizi orta hesabla 90 faizə yaxındır. Elə cinayətlər var ki, xüsusən şəxsiyyət əleyhinə olan cinayətlərin 100 faiz açılması təmin edilib.

Bu il adamların girov götürülmə faktı qeydə alınmayıb.

Qeyd edək ki, nazirliyin oğurluqların azalması ilə bağlı təqdim etdiyi statistika sosial şəbəkələrdə birmənalı qarşılanmayıb. Əksəriyyət statistikanın əksinə olaraq oğurluq faktlarının azalmadığını dilə gətiriblər.

Lent.az DİN-in yaydığı rəsmi statistika ətrafında araşdırma aparıb.

Araşdırma zamanı hüquq-mühafizə orqanlarından əldə etdiyimiz faktlar nəticəsində məlum oldu ki, ölkədə oğurluq əməli törədənlərin böyük əksəriyyəti narkotik istifadəçiləridir. Belə ki, onlar narkotik əldə etmək üçün bu kimi cinayətlərə əl atırlar. Oğurluğa görə tutulan şəxslərin əksəriyyəti bu səbəbdən cinayət törətməyə vadar olduqlarını dilə gətirir. Bu ilin əvvəlindən isə respublikada narkotik istifadəçiləri və narkotiklərin qanunsuz dövriyyəsi ilə məşğul olan şəxslərə qarşı daha sərt tədbirlərə start verilib. Narkotiklərin qanunsuz dövriyyəsinə qarşı görülən tədbirlərin daha da sərtləşməsi nəticəsində yanvar-noyabr ayları ərzində 7397 nəfər cinayət məsuliyyətinə cəlb olunub. Bu da oğurluq törədən şəxslərin sayının azalması ilə nəticələnib.

Onu da qeyd edək ki, nakotiklərlə bağlı cinayət məsuliyyətinə cəlb edilənlərdən 2718 nəfəri narkotik satışında, 4210 nəfəri isə narkotiklərdən istifadə etməkdə və saxlamaqda təqsirləndirilirlər.

Rəsmi məlumata görə, bu ilin yanvar-noyabr ayları ərzində Azərbaycanın daxili işlər orqanları tərəfindən ümumilikdə 3 tona yaxın olmaqla 1 ton 390 kq heroin, 1 ton marixuana və digər narkotik tərkibli maddələr dövriyyədən çıxarılıb.