Yol qəzalarında bir gündə 5 nəfər ölüb

Lent.az-ın Daxili İşlər Nazirliyinin saytına istinadən xəbərinə görə, Ağcabədi rayonunda Füzuli rayon sakini Abış Əliyev idarə etdiyi “QAZ-24” markalı avtomaşını onu ağaca vurub. Nəticədə A.Əliyev aldığı xəsarətdən hadisə yerində ölüb.

Qəbələ rayon sakini Vüqar Cavadov isə idarə etdiyi “BMW-320” markalı avtomaşını aşırıb. Qəza nəticəsində onun sərnişini Günel Cavadova aldığı xəsarətdən hadisə yerində ölüb.

Göygöl rayonunun Balçılı kəndi ərazisində də Şəmkir rayon sakini Rahib Əsgərov "UAZ-469" markalı maşını ilə Mərək kənd sakini Suqra İsmayılovanı vuraraq, öldürüb.

Başqa bir qəza hadisə də Şəkidə baş verib. Şəhər sakini Kamran Qafarovun idarə etdiyi "VAZ-21099" markalı və Çələbixan qəsəbə sakini Aqil Hüseynovun idarə etdiyi "QAZel" markalı avtomaşınlar toqquşub və nəticədə K.Qafarov xəstəxanaya aparılarkən yolda ölüb. A.Hüseynova isə tibbi yardım göstərildikdən sonra buraxılıb.

Sonuncu qəza hadisəsi isə Bakının Nizami rayonu ərazisində yaşanıb. Belə ki, Bakı sakini Rasim Cahangirov idarə etdiyi "Toyota Prado" markalı avtomaşını 65-70 yaşlı qadını vurub. Xəsarətlə xəstəxanaya yerləşdirilmiş həmin qadın orada ölüb.