Hüseyn Dəryanın bacısı jurnalistləri təhqir etdi

Reperin cinayət işi üzrə məhkəmə istintaqı yekunlaşıb

Bu gün Ağır Cinayətlərə Dair İşlər üzrə Məhkəmədə narkotik vasitələrin qanunsuz əldə olunması, istifadəsində və silah əldə edib saxlamaqda təqsirləndirilən məşhur reper Hüseyn Muradov (Dərya), Bəylər Qəmbərov və Hikmət Şahverdiyevin cinayət işi üzrə məhkəmə prosesi davam etdirilib.

Lent.az-ın məlumatına görə, hakim Mayıl Bayramovun sədrlik etdiyi prosesdə məhkəmə istintaqının yekunlaşdığı elan olunub. Prokuror çıxış üçün vaxt istəyib.

Məhkəmə prosesi zamanı Hüseyn Dəryanın bacısı jurnalistləri təhqir edib. O, jurnalistləri məhkəmə prosesini düzgün işıqlandırmamaqda ittiham edib: “Jurnalistlər ağızlarına gələni yazır. Mən bilirəm bunlar hardan gəlir, niyə belə şeylər yazırsınız”.

Hakim M.Bayramov bu məsələyə münasibət bildirərək prosesi işıqlandıran jurnalistlərdən narazı olmadığını bildirib: “Jurnalistlərin prosesdə iştirak etməyə hüquqları var və onlar məhkəməni obyektiv işıqlandırırlar”.

Məhkəmə prosesi martın 6-da davam etdiriləcək.

Qeyd edək ki, Bəylər Qəmbərov, Hikmət Şahverdiyev Cinayət Məcəlləsinin 234-cü (qanunsuz olaraq narkotik vasitə əldə etmə, saxlama, satma, daşıma, göndərmə), Hüseyn Muradov (Dərya) isə 234-cü (qanunsuz olaraq narkotik vasitə əldə etmə, saxlama, satma, daşıma, göndərmə) və 228.1-ci (qanunsuz olaraq odlu silah əldə etmə, saxlama, satma, daşıma) maddələri ilə təqsirləndirilir.

Şəhriyar Əlizadə