“Yəhovanın şahidləri” DİN-ə qalib gəldi

Ali Məhkəmədə “Yəhovanın şahidləri” dini icmasının kassasiya şikayətinə baxılıb.

Məhkəmədən APA-ya verilən məlumata görə, Mülki İşlər üzrə Məhkəmə Kollegiyasının hakimi Əsəd Mirzəliyevin sədrliyi ilə keçirilən məhkəmə iclasında dini icmanın Daxili İşlər Nazirliyinə, Xətai rayon Polis İdarəsinə və həmin idarəsinin 34-cü Polis Bölməsinə qarşı kassasiya şikayəti təmin edilib, o cümlədən “Yəhovanın şahidləri” dini icmasından mətbuat vasitəsi ilə üzr istəmə, maddi və mənəvi ziyanın ödənilməsi və polis əməkdaşları barəsində intizam tədbirlərinin görülməsi ilə bağlı iddia əsaslı sayılıb.

Məhkəmənin qərarı ilə Bakı Apellyasiya Məhkəməsinin 3 sentyabr 2008-ci il tarixli qətnaməsi ləğv edilib, iş yenindən apellyasiya baxışına göndərilib.

Qeyd edək ki, ötən il Bakıda “Yeddinci günün adventistləri”, Gəncə və Sumqayıt şəhərlərində isə “Yəhovanın şahidləri” dini icmalarının üzvləri polis tərəfindən saxlanılıb, icmaların təsdiq olunan nizamnamələri ilə onların müvafiq fəaliyyət ərazisi müəyyən edilib və xəbərdarlıq edildikdən sonra sərbəst buraxılıblar.