Rail Rzayevin yerinə tezliklə təyinat olacaq

Vahid Əliyev: “Yaxın vaxtlarda Azərbaycan Hərbi Hava Qüvvələri və Hava Hücumundan Müdafiə Qoşunlarına yeni komandan təyin olunacaq”

“Azərbaycan Hərbi Hava Qüvvələri və Hava Hücumundan Müdafiə Qoşunlarına yeni komandanın təyin olunması məsələsinə hazırda baxılmır”.

Bunu APA-ya eksklüziv açıqlamasında Azərbaycan prezidentinin hərbi və təhlükəsizlik məsələləri üzrə köməkçisi, general-leytenant Vahid Əliyev bildirib.

Bu postun boş qalmayacağını qeyd edən V. Əliyev Azərbaycan Hərbi Hava Qüvvələri və Hava Hücumundan Müdafiə Qoşunlarının komandanı vəzifəsinə təyinatın yaxın vaxtlarda olacağını da söyləyib: “Yəqin ki, yaxın vaxtlarda bu vəzifəyə təyinat olacaq”.

Azərbaycan Hərbi Hava Qüvvələri və Hava Hücumundan Müdafiə Qoşunlarının əvvəlki qaydada döyüş növbətçiliyini yerinə yetirdiyini qeyd edən V. Əliyev ölkənin hava məkanının qorunmasında heç bir problemin olmadığını vurğulayıb.

Qeyd edək ki, Azərbaycan Hərbi Hava Qüvvələri və Hava Hücumundan Müdafiə Qoşunlarının komandanı, general-leytenant Rail Rzayev fevralın 11-də naməlum şəxslər tərəfindən qətlə yetirilib. R. Rzayev 1992-ci ildən bu vəzifədə çalışıb.