Güney Azərbaycanda daha bir zəlzələ

İranın Şərqi Azərbaycan vilayətində yenidən zəlzələ baş verib.

Azərbaycan Milli Elmlər Akademiyası Respublika Seysmoloji Xidmət Mərkəzindən APA-ya verilən məlumata görə, Bakı vaxtı ilə saat 19.02-də əvvəlki zəlzələ ocağında baş verən zəlzələnin gücü episentrdə 5,0 bal, dərinliyi 10 km olub.

Təkanlar Azərbaycanın İranla sərhəd ərazilərində də hiss olunub. Zəlzələ daha çox Lənkəran rayonunda - 2, 5 bal gücündə hiss edilib.

Bundan başqa, Astara rayonunda, Naxçıvan Muxtar Respublikasında da yeraltı təkanlar qeydə alınıb.

Qeyd edək ki, avqustun 11-də İranda episentri Vərzigan olmaqla Təbriz, Əhər, Ərdəbil və Urmiya şəhərlərində 6.2 bal gücündə zəlzələ baş verib. Ən çox tələfat Əhər, Vərzigan və Heris şəhərlərindədir. Təbii fəlakət nəticəsində 306 nəfər ölüb, 3000-dən artıq insan yaralanıb.