İrandan öhdəliklərə əməl etməsi istənilib

BMT Baş Assambleyası İranda insan hüquqlarının pozulmasını məhkum edən qətnaməni səsə qoyub.

Lent.az-ın məlumatına görə, Kanadanın təklifi ilə səsə qoyulan qətnaməni 86 nümayəndə dəstəkləyib. Hindistan, Livan, Sudan, Suriya və Şimali Koreya ölkələri daxil olmaqla 32 ölkə sənədin əleyhinə səs verib, 65 isə tərəfsiz qalıb.

Qətnamədə bildirilib:«Son vaxtlar İranda dinc siyasi fəallara qarşı işgəncə və edamlar artıb, söz və ifadə azadlığı məhdudlaşdırılıb, dini və etnik azlıqlara, o sıradan da bəhailərə qarşı təzyiqlər, təqiblər genişlənib. İran hakimiyyəti ölkədə siyasi fəallara, jurnalistlərə, hüquq müdafiəçilərinə, eləcə də dini və etnik azlıqlara qarşı təzyiqi dərhal dayandırmalı, insan hüquqları ilə bağlı üzərinə götürdüyü beynəlxalq öhdəlikləri yerinə yetirməlidir”.

İran tərəfi bu sənədi həmişəki kimi «qərəzli» sayıb. Tehranın qurumdakı təmsilçisi Məhəmməd Xəzainin sözlərinə görə, «bu qətnamə İranın hazırkı vəziyyətini əks etdirmir».