Rusiyada 8 və 13 yaşlı uşaqların nikah mərasimi baş tutub

Rusiyanın Həştərxan vilayətində yaşayan 13 yaşlı qız anasının təşkil etdiyi toyda 8 yaşlı oğlana ərə verilib.

Lent.az xəbər verir ki, sosial şəbəkələrdə paylaşılan görüntülər böyük əks-səda doğurub.

Qaraçı icmasının daha çox cəmləşdiyi Həştərxan vilayətində 13 yaşlı qız anası tərəfindən zorla ərə verilib.

Qaraçı olduğu deyilən ana öz qızını ailə dostu olan qadının 8 yaşlı oğlu ilə evləndirib.

Toy zamanı çəkilən görüntülərdə ağ gəlinlikdəki qızla sürməyi kostyumlu oğlanın könülsüz rəqs etdiyi görünür.

Rusiya Dövlət Dumasının Ailəni Müdafiə Komitəsinin rəhbəri Nina Ostanina hadisəyə sərt reaksiya göstərərək, Rusiya vətəndaşı olan hər kəs ölkə qanunlarına əməl etməli olduğunu deyib.

Qeyd edək ki, Rusiyada nikah üçün minimum yaş həddi 18-dir, 16 yaşlı yeniyetmələrə yalnız xüsusi hallarda yerli hakimiyyət orqanlarının icazəsi ilə evlənməyə icazə verilir.

Hadisə ilə bağlı araşdırma başlayıb.