Palıd qozaları təhlükəli xəstəliyin yayılmasını iki il əvvəldən xəbər verə bilər

ABŞ alimləri 35 ildən çox davam edən araşdırmada palıd qozalarının məhsuldarlığı ilə gənə populyasiyasının artması arasında gözlənilməz əlaqə müəyyənləşdiriblər.

Lent.az xəbər verir ki, bu barədə “ScienceDaily” Keri Ekosistem Tədqiqatları İnstitutunun araşdırmasına istinadən məlumat yayıb.

Tədqiqatçılar Laym xəstəliyinin yayılmasında maralların rolunun əvvəllər düşünüldüyündən daha məhdud ola biləcəyini müəyyənləşdiriblər. Əvəzində siçan populyasiyasının artması daha güclü göstərici kimi qiymətləndirilib.

Müşahidələrə əsasən, siçanların sayının yüksək olduğu illərdən sonra gənələrin sayı növbəti ildə təxminən 40 faiz çox olub. Alimlər palıd qozalarının bol olduğu illərin də iki il sonrakı gənə artımı ilə əlaqəli ola biləcəyini bildirirlər.

Laym xəstəliyi yoluxmuş gənələrin dişləməsi ilə insanlara keçən bakterial infeksiyadır. Tədqiqatın nəticələri müəyyən ərazilərdə xəstəlik riskinin əvvəlcədən qiymətləndirilməsi üçün faydalı ola bilər.