ABŞ-da Maska İTTİHAM: Putinin elçisidir

ABŞ-ın keçmiş prezidenti Donald Trampın Rusiya üzrə müşaviri Fiona Hill “Politico”ya müsahibəsində bildirib ki, sahibkar İlon Mask Ukrayna münaqişəsinin həlli təklifi ilə yalnız Rusiya prezidenti Vladimir Putinin mesajını çatdırıb.

Lent.az-ın xarici mediaya istinadla xəbərinə görə, Hill deyib ki, Ukrayna ilə bağlı yaranmış vəziyyətin sülh razılaşması ilə həlli təklifindən əvvəl Mask sentyabr ayında Aspendə keçirilən tədbirdə oxşar bəyanatla çıxış edib və Krımı da Rusiya kimi tanıyıb. Eyni zamanda, milyarder vurğulayıb ki, Xerson vilayəti və Zaporojye üzərində nəzarət danışıqlar mövzusu olmalıdır, çünki yarımadanın bu bölgələrdən suya ehtiyacı olacaq.

“Sudan bəhs o qədər spesifikdir ki, bu, açıq-aşkar Putinin mesajıdır” deyən politoloq Putinin tez-tez məşhur şəxslərdən vasitəçi kimi istifadə etdiyini vurğulayıb. Hill, Maskın böyük təsir və şöhrətə sahib olduğuna diqqət çəkib və deyib ki, buna görə də ictimai rəyə təsir edə bilir.

Bundan əvvəl İlon Mask Rusiya və Ukrayna arasında danışıqlarda vasitəçilik imkanlarından danışmışdı. “Vice” jurnalı Maskın “Ukraynaya sülh gətirmək planını” dərc etməzdən əvvəl Putinlə telefon danışığı apardığını bildirib. Lakin sahibkar bu məlumatı təkzib edərək bildirib ki, Rusiya lideri ilə sonuncu dəfə 18 ay əvvəl danışıb və söhbətlərinin mövzusu kosmos olub.