Ölkə şokda: təriqətçilər 10 ildir insanları zirzəmidə saxlayırmış - FOTO

Tatarıstan prokurorluğu dəhşətli cinayətin üstünü açıb. Lent.az-ın Rusiya KİV-ə istinadən verdiyi məlumata görə, özünü “feyzrəhmançılar” adlandıran dini təriqətin üzvləri 10 ildən çoxdur ki, uşaqlarını zirzəmidə saxlayırmışlar.

Məlumatda deyilir ki, təriqətin rəhbəri Feyzrəhman Səttarov təriqət üzvlərinə uşaqlarını nəinki zirzəmidə saxlamağı əmr edib, üstəlik, onlara hər hansı tibbi yardım göstərməyi də yasaq edibmiş.

“Zirzəmidə 16 yaşınadək bir neçə uşaq və valideyn olub. Onlar illər boyu yarıqaranlıq, hava çəkməyən otaqlarda yaşayıblar. Hazırda həmin uşaqlar xəstəxanalara yerləşdiriliblər” - deyə Kazan şəhər prokurorunun köməkçisi İrina Petrova bildirib.

Təriqət rəhbəri və Səttarovun özü isə deyilənləri təkzib edib. “Bizim 70 üzvümüz var. Düzdür, zirzəmi darısqal olub. Bir kvadratmetrə təxminən üç nəfər yerləşib. Amma hamı bilməlidir ki, bu ərazini biz öz dövlətimizin ərazi sayırıq. Necə və hansı şəraitdə yaşamağımızı isə özümüz müəyyən edirik” - deyə, təriqət üzvləri deyiblər.

Kazan şəhər prokurorluğu “feyzrəhmançılar”ın işi üzrə cinayət işi qaldırıb.

Səbuhi