Bu cümə də qan töküldü

Lent.az-ın “Əl-Cəzirə” telekanalına istinadən verdiyi məlumata görə, Deyr-ez-Zor şəhərində polis aksiyaçılara atəş açıb və 6 aksiya iştirakçısı həyatını itirib.

Paytaxt Dəməşq yaxınlığındakı Xacr-əl-Asvad şəhərində xüsusi təyinatlılar məscidə aksiyaçıları mühasirəyə alıb. Şəhərin üzərində vertolyotlar uçur. Dəməşq yaxınlığındakı Xumuri və Arbin qəsəbələrində də aksiya iştirakçıları və təhlükəsizlik qüvvələri arasında toqquşma baş verib. İlkin məlumata görə, yaralılar var. Suriya Dövlət Televiziyası isə Hums şəhərində silahlıların hərbçilərə hücum çəkdiyi, cavab atəşi ilə silahlılardan 2-nin öldürüldüyü barədə xəbər yayıb.

Bu gün ilk dəfə Suriyanın şimalında yerləşən və ölkənin iqtisadi paytaxtı sayılan Aleppoda da hökumət əleyhinə aksiya keçirilib. Hökumət bu şəhərdə ciddi təhlükəsizlik tədbirləri görsə də, aksiyanın keçirilməsinin qarşısını almaq mümkün olmayıb.