Meymun da öz şəkilini çəkdi

Lent.az-ın “The Daily Mail” qəzetinə istinadən verdiyi məlumata görə, qara makaka Sulvesi adasındakı cəngəlliklərdə fotoqraf-səyyah, 46 yaşlı İngiltərə vətəndaşı Devid Sleyterin fotokamerasını oğurlayıb və özünün bir neçə şəklini çəkib.

Devid Sleyter deyib ki, ada cəngəlliklərindəki meymun sürüsü onunla dostlaşıb. Bu meymunlardan biri də kameranı çırpışdırıb: “Həmin meymun fotokameranın düyməsini basdı. Düyməni tez-tez basan zaman çıxan səsdən digər meymunlar qorxub qaçmağa başladılar. Ancaq sonra geri qayıtdılar. Həmin vaxt mən fotokameranı götürdüm. Fotokamerada yüzlərlə şəkil vardı, ancaq az qismi dəqiq çəkilmişdi. Görünür ki, onların hələ təcrübələrini artırması lazımdır. Təəssüf ki, mən meymunun bütün ailə albomu düzəltməsi üçün çox qalıb gözləməyi bacarmadım”.