Rusiya ABŞ-dan «Maqnitsk aktı»nın «qisasını alır»

Sabahdan ABŞ Rusiyaya donuz və qaramal ətinin ixracatını dayandıra bilər.
Lent.az-ın «BBC»yə istinadən məlumatına görə, bu haqda Amerika ət ixracatı üzrə federasiya məlumat yayıb.

Rusiya həmin məhsullarda raktopamin əlavəsi izlərinin olmamasını tələb edib. «Bu Rusiyanın siyasi tələbidir. Onlar senatın «Maqnisk aktı»nın qisasını alırlar» - deyə, federasiyadan bildiriblər.

Raktopamin istehsalçılar tərəfindən heyvanın əzələ kütləsini artırmaq üçün yemə əlavə kimi qatılır. İstehlakçının sağlığına təhlükə yaratdığı üçün bu preparat Rusiyada yasaqlanıb.

ABŞ-ın mal və donuz əti ixraсatçıları arasında Rusiya 6-cı yeri tutur.

Qeyd edək ki, «Hermitage» fonudun keçmiş auditoru, hüquqçu Sergey Maqnitsk 2009-cu il noyabrın 16-da Rusiya istintaq təcridxanasında öldürülüb. O, vergidən yayınmaqda ittiham edilərək, tutulmuşdu. Bu olayadək isə Maqnitsk Rusiya dövlət büdcəsinin güc strukturları tərəfindən talan edildiyi faktını açıqlamışdı.