Tehran ölkəyə 130 milyonluq dərman daşıtdırır

İranda tibbi preparatların qıtlığı yaranıb. Hələ ötən ay İran parlamentinin üzvü bildirmişdi ki, ölkədə iki aylıq dərman ehtiyatı qalıb.

Lent.az-ın İslam Respublikasının informasiya vasitələrinə istinadən məlumatına görə, bu çatışmazlığı aradan qaldırmaq üçün hakimiyyət tibbi preparatların ölkəyə təcili gətirilməsinə başlayıb.

Bu haqda İran Səhiyyə Nazirliyi dərman preparatlarına nəzarət departamentinin rəisi Məhəmməd Əbdüzadə açıqlama verib. Onun sözlərinə görə, Mərkəzi Bank bu məqsədlə 130 milyon dollar ayırıb.

O, deyib ki, nəzərdə tutulan dərmanlar mərhələ-mərhələ ölkəyə gətiriləcək.

İran Hemofiliyada müalicə birliyinin baş direktoru Əhməd Cavidelin sözlərinə əsasən, hemofiliya xəstələri üçün dərman çatışmazlığı yaranıb.

Rəsmi məlumatlar əsasən, ölkədə 7 min hemofiliyadan əziyyətçəkən insan yaşayır.

Mütəxəssislərin fikrincə, Tehran hakimiyyətinin iddialı nüvə proqramı ucbatından ölkə vətəndaşları ciddi problemlərlə üz-üzə durub. Onlar İran hakimiyyəti dərmanlarla bağlı hay-küy salmaqla özünün atom - proqramını gizlətməyə çalışır.