Kreml Telman İsmayılova “yaşıl işıq” yandırdı

Lent.az-ın Rusiya KİV-ə istinadən verdiyi məlumata görə, tikintini Telman İsmayılovun sahibi olduğu AST Şirkətlər Qrupu aparacaq.

Xatırladaq ki, adıgedən ərazidə yaşayan köhnə moskvalılar şəhərin memarlığına zərər gətirəcəyinə görə, Nikitinski bulvarda hündür mərtəbəli binanın tikintisinə imkan vermirdilər. Görünür, Moskva meriyası şəhər ictimaiyyəti ilə kompromisa gəlib: adı gedən küçədə 6 mərtəbəli 5 ulduzlu otel tikiləcək.

Tikintini AST Şirkətlər Qrupunun həyata keçirməsi də maraqlı məqamlardandır. Çünki bir neçə il əvvəl rəsmi Kreml Telman İsmayılovu arzuolunmaz şəxs elan etmişdi. İsmayılova məxsus “Çerkizova” bazarı bağlandıqdan sonra onun Moskvadakı digər biznes strukturlarına, eləcə də məşhur “Praqa” restoranına əl qoyulmuşdu.

Moskva meriyasının Kremlin bir neçə yüz metrliyində İsmayılova tikinti aparmağa icazə verməsinin arxasında nələr durduğu isə bir müddət sonra aydın olacaq.

Hələlik aydın olan bircə odur ki, Telman İsmayılov Kremlin xeyir-duası ilə yaradılmış Ümumrusiya Azərbaycanlıları Təşkilatları İttifaqının, Azərbaycan mediasının “Milyarderlər İttifaqı” adlandırdığı qurumun təsisçilərindəndir.

Səbuhi Məmmədli