Avropa Birliyi ŞKTC-ə 27 milyon avro yardım ayırıb

Avropa Birliyinin komissiyası Şimal Kipr Türk Cümhuriyyətinə (ŞKTC) 27,2 milyon avroluq yeini maliyyə yardım haqqında qərarı təsdiqləyib. Lent.az-ın «Habertürk»-ə istinadən məlumatına görə, qurumun genişlənməsi üzrə komissiyasının məsulu Stefan Füle deyib: «Adanın gələcəkdə yenidən birləşdirilməsini dəstəkləməkdəyik».

Qurumun açıqlamasına əsasən, bu yardım Kiprin yenidən birləşdirilməsi məqsədi ilə iqtisadi inteqrasiyanı təşviq edəcək, habelə heyvan xəstəliklərinin azaldılması, ətraf mühitin qorunması, yolların təhlükəsizliyinin artırılması, mədəni irsin qorunması və vətəndaş cəmiyyətinin dəstəkləməsi ilə bağlı sahələrə xərclənəcək.

S.Füle daha sonra bildirib:«Bu yeni fon AB-nin Kiprdəki türk əhalisinin iqtisadi inteqrasiyasına sağlam yanaşmanın göstəricisidir. İki cəmiyyət arasında dialoq və ortaq zənginləşmə ilə adanın gələcəkdə yenidən birləşdirilməsini dəstəkləyəcəyik».

Qurum təmsilçisi 2006-cı ildən bu yana Şimal Kipr Türk Cümhuriyyətinə edilən maliyyə yardımının 320 milyonu aşdığını da vurğulayıb.