Naziri ağlatdılar –

Noyabrın 20-də Türkiyə xarici işlər naziri Əhməd Davudoğlu Ərəb Liqası ölkələrinin xarici işlər nazirləri ilə birlikdə İsrailin hücumuna məruz qalan Qəzza sektoruna gedib. Lent.az-ın “Hürriyet” qəzetinə istinadən verdiyi məlumata görə, Əhməd Davudoğlu Qəzzada hücumlar zamanı həyatını itirən fələstinli ailələrlə də görüşüb.

Həyat yoldaşı Sare Davudoğlu və Türkiyənin baş naziri Rəcəb Tayyib Ərdoğanın oğlu Bilal Ərdoğan ilə Qəzzadakı Şəfa Xəstəxanasını ziyarət edən Əhməd Davudoğlu yaxınlarını itirən fələstinlilərə başsağlığı verib. O, həyatını itirmiş bir fələstinlinin yaxınları ilə qucaqlaşarkən göz yaşlarını saxlaya bilməyib. Əhməd Davudoğlunun hıçqıraraq, ağlaması ətrafdakı insanları da kövrəldib. Yaxın qohumunu itirmiş fələstinli ilə Əhməd Davudoğlu bir neçə dəqiqə bir-birindən ayrıla bilməyib.

Xarici işlər nazirinin uzun müddət xəstəxanada qarşılaşdığı mənzərə və yaşadıqlarının təsiri altında qaldığı müşayiət olunub. Daha sonra Əhməd Davudoğlu Ərəb Liqası dövlətlərinin xarici işlər nazirləri ilə birlikdə Qəzzadan ayrılıb. Fələstində dəstək məqsədi ilə belə bir ziyarəti gerçəkləşdirən xarici işlər nazirləri Refah sərhəd-keçid məntəqəsindən Misirə keçiblər.