PKK-ya böyük zərbə

PKK terror təşkilatının rəhbərliyində yer alan terrorçulardan biri yaxalanıb. Lent.az-ın Türkiyənin NTV telekanalına istinadən verdiyi məlumata görə, PKK-nın şəhər mərkəzlərində böyük partlayışlar, aksiyalar törətmək məqsədi ilə yaratdığı Müdafiə Birliyinin Türkiyə üzrə məsul nümayəndəsi C.A. Diyarbəkirdə yaxalanıb.

Bu barədə bu gün Diyarbəkir valisi Mustafa Toprak və Diyarbəkir Polis İdarəsinin rəisi Rəcəb Güvən keçirdikləri birgə mətbuat konfransında məlumat veriblər. Mustafa Toprak C.A.-nın yaxalanması ilə PKK-ya böyük zərbə vurulduğunu söyləyib. C.A. yaxalanan zaman üzərində silah və PKK terror təşkilatına aid çoxlu miqdarda sənəd olub. O, PKK terror təşkilatının əsas bazalarının yerləşdiyi Qəndildə təxribat, sui-qəsd, bombalı partlayışla bağlı təlim keçib. C.A. Türkiyədə yol kəsmə, təhlükəsizlik qüvvələrinə silahlı hücum kimi bir çox olayın təşkilatçısı olub.