Türkiyə İraqın Şimalındakı hökumətdən neft alır

Türkiyənin baş naziri Rəcəb Taip Ərdoğan Misirə səfərdədir.

Lent.az-ın «Habertürk»-ə istinadən məlumatına görə, o, Qahirəyə yola düşməzdən öncə Atatürk Hava limanında dövlət qonaq evində mətbuat konfransı keçirib.

O, İraqın Şimalındakı hökumətin başçısı Neçrivan Bərzani ilə ötən gün keçirdiyi görüş haqda məlumat verib.

Türkiyəнin təbii ehtiyatlar naziri Tanər Yıldızın İraqın Şimalındakı təbii ehtiyatlar naziri Aşti Havarami ilə fəaliyyət göstərdiklərini söyləyib:«Təbii qaz və xam neft yataqları ilə bağlı bir sıra işlər görüldü. Burada mərkəzi İraq hakimiyyətini sıxıntıya sala biləcək bir məsələdən söhbət gedə bilməz. Şimal İraq öz potensialı daxilində görə biləcək işlərlə məşğuldur.

Bundan kənar istənilən məsələdən danışmaq düzgün deyil. Onlar bizə xam neft verir, qarşılığında biz onlara benzin, mazut kimi məhsullar tədarük edirik. Bu yöndə onlarla fəaliyyətimizi davam etdirəcəyik».

Baş nazir İraqın Şimalında Süleymaniyyə kimi bölgələrdə elektrik enerjisinin qıt olduğunu deyərək, bu yöndə də sərmayələrin yatırılacağını vurğulayıb.