Türkiyə NATO-dan “Patriot” istəyəcək

Türkiyə Xarici İşlər Nazirliyi Türkiyə-Suriya sərhədinə “Patriot” raket sistemi yerləşdirilməsi üçün NATO-ya rəsmi müraciət edəcək.
Lent.az-ın “Hürriyet” qəzetinə istinadən verdiyi məlumata görə, Türkiyə Xarici İşlər Nazirliyinin yüksək rütbəli rəsmisi bu uzaq mənzilli raketlərdən Suriyada prezident Bəşər Əsədə sadiq qüvvələrin müxalifət və mülki şəxslər üzərinə hücumlarını dayandırmaq üçün istifadə edilməsi variantının müzakirə edilən ssenarilərdən biri olduğunu söyləyib.
Bu plan ABŞ-da keçirilən prezident seçkiləri ilə əlaqədar təxirə salınıb, ancaq Barak Obama yenidən ABŞ prezidenti seçildiyi üçün gündəmə gəlməsi qaçılmazdır. “Patriot” raket sistemləri Türkiyə-Suriya sərhədinə NATO-nun xətti ilə yerləşdiriləcək.
Qeyd edək ki, bir neçə gün əvvəl NATO baş katibi Anders Foq Rasmussen deyib ki, əgər Ankara Türkiyə-Suriya sərhədinə “Patriot” raket sistemlərinin yerləşdirilməsi ilə bağlı müraciət edərsə, alyans bunu müzakirə etmək məcburiyyətindədir.