Gürcüstan ordusunun Baş Qərargah rəisi tutuldu

Noyabrın 7-nə keçən gecə Tiflisdə Gürcüstan Silahlı Qüvvələri Birləşmiş Qərargah rəisi Georgi Kalandadze və 4-cü briqadanın komandiri Zurab Şamatava həbs olunub. Lent.az-ın “Qruziya Online”yə istinadən verdiyi məlumata görə, onlar səlahiyyət həddini aşmaqda ittiham edilirlər.

Agentlik qeyd edir ki, Kalandadze gecə yarısı təcili olaraq Müdafiə Nazirliyinə dəvət edilib. Onu elə nazirliyin binasındaca həbs ediblər. “Rustavi-2” telekanalının məlumatına görə, həbs yeni ədliyyə naziri Teya Tsulukianinin göstərişi ilə həyata keçirilib və yeni baş prokuror Arçila Kbilaşvilininin baş verənlərdən xəbəri olub.

Baş Qərargah rəisi və briqada komandiri keçmiş müdafiə naziri Baço Axalainin dindirilməsindən sonra tutulublar. Hələlik onlara qarşı rəsmi ittiham irəli sürülməyib.

Həbslər Gürcüstanda hökumətin dəyişməsindən sonra başlayıb. Xatırladaq ki, oktyabrın 1-də keçirilən seçkilərdə milyarder Bidzina İvanişvilinin yaratdığı “Gürcü arzusu” koalisiyası qalib gəlib. Oktyabrın sonunda yeni hökumət formalaşıb. Prezident Mixail Saakaşvili postunu qorusa da, o, faktiki olaraq parlament və hökuməti itirib.