Bakı İslam Universitetinə lisenziya veriləcək

Təhsil Nazirliyində sənədin bu həftə imzalanacağına söz veriblər

Bakı İslam Universitetinə lisenziya verilməsi məsələsi artıq həll edilib. Belə ki, Təhsil Nazirliyi həftənin sonunda lisenziya sənədini imzalayıb universitetə təqdim ediləcəyini vəd edib.

Lent.az-ın məlumatına görə, Bakı İslam Universitetinin rektoru Hacı Sabir Həsənli Qafqaz Müsəlmanları İdarəsinin XII qurultayında belə deyib. Onun sözlərinə görə, təhsil Nazirliyi Dini Qurumlarla İş üzrə Dövlət Komitəsinin əməkdaşı ilə birgə universitetdə yoxlamalar aparıb. Həmin yoxlamadan sonra universitetin regional filiallarının bağlanması barədə qərar çıxarıb və bu il şöbələrə tələbə qəbulu dayandırılıb.

Bununla belə, yoxlamalarda universitetin özünün lisenziyalaşdırılması üçün qanuni maneənin olmadığı müəyyənləşib. Bu səbəbdən də təhsil Nazirliyi universitetə lisenziya verilməsini məqsədəuyğun hesab edib.

Sabir Həsənli onu da bildirib ki, lisenziya olmadığından universitetin məzunları elmi işlərlə məşğul ola bilmir. Çünki Ali Attestasiya Komissiyası məzunların seçdiyi mövzunu və elmi istiqaməti qəbul etmir. Onun sözlərinə görə, təhsil Nazirliyi tərəfindən universitetə lisenziya verildikdən sonra bu məsələ də həllini tapacaq.

Elxan SALAHOV