Komitə sədri dindarlara müraciət etdi

Hidayət Orucov din xadimlərini Azərbaycanın maraqlarına xidmət etməyə çağırdı

“Qafqaz Müsəlmanları İdarəsi son on ildə özünün 3 qurultayını keçirib və bunların hamısında mən də iştirak etmişəm. Bu 10 ildə Azərbaycanın həyatında qlobal dəyişikliklər baş verib. Ölkədə dini etiqad azadlığı sözün tam mənasında təmin edilib. Dövlətin bu sahəyə münasibəti getdikcə tənzimlənir. İndi Azərbaycan dinə münasibətdə təkcə regionda deyil, bütün dünyada unikal nümunəyə çevrilib”.

Lent.az-ın məlumatına görə, Dini Qurumlarla İş üzrə Dövlət Komitəsinin sədri Hidayət Orucov Qafqaz Müsəlmanları İdarəsinin XII qurultayındakı çıxışında belə deyib. O, din xadimlərini milli-mənəvi dəyərlərin qorunmasında dövlətə dəstək verməyə çağırıb.

“Mən din xadimlərinə müraciət edirəm. Siz çox böyük qüvvəsiniz, ətrafınızda yüzlərlə, minlərlə sadə insanlar cəmləşib. Siz böyük söz kürsüsünə maliksiniz. Xahişim odur ki, bu kürsüdən dini dəyərlərimizin qorunmasına, sivilizasiyalı cəmiyyətə doğru inkişafa və ən əsası Azərbaycanın maraqlarına xidmət edəsiniz” - deyə, Hidayət Orucov bildirib.

Elxan SALAHOV