Dindarlar prezidentə müraciət etdi

QMİ-nin XII qurultayı başa çatdı

Qafqaz Müsəlmanları İdarəsinin (QMİ) bu gün keçirilən XII qurultayı başa çatıb. Qurultayda 250 nümayəndədən 238-i iştirak edib.

Lent.az-ın məlumatına görə, qurultayda Qazılar Şurasının fəaliyyəti haqqında hesabat, o cümlədən Nəzarət-Təftiş Komissiyasının hesabatı dinlənildikdən sonra QMİ-nin nizamnaməsinə təklif olunan əlavə və dəyişikliklər müzakirə olunub. Çıxışçı dindarların rəy və təklifləri dinlənildikdən sonra nizamnaməyə dəyişikliklər səsə qoyularaq, qəbul edilib.

Qurultayın sonunda dindarların dövlət başçısı İlham Əliyevə müraciəti oxunub. QMİ-nin sədr müavini Hacı Sabir Həsənli müraciəti qurultay iştirakçılarına oxuduqdan sonra sənəd yekdilliklə qəbul olunub.

Xatırladaq ki, QMİ-nin bundan əvvəlki – XI qurultayı 2004-cü ildə keçirilmişdi.

Elxan SALAHOV