Mobil telefonlar beyin xərçənginə səbəb ola bilərmi? - ARAŞDIRMA

Mobil telefonların beyin xərçənginə səbəb ola biləcəyi uzun müddətdir deyilir. ÜST bu fərziyyənin nə dərəcədə real olduğunu yoxlamaq üçün araşdırma aparıb.

Lent.az xarici mətbuata istinadən xəbər verir ki, məsələnin mənşəyi 1993-cü ilə gedib çıxır. Florida sakini David Reynard “NEC America”ya qarşı məhkəməyə müraciət edərək, cib telefonundan gələn radiasiyanın həyat yoldaşının beyin xərçənginə səbəb olduğunu və nəticədə onun ölümünə səbəb olduğunu iddia edib. Məhkəmə 1995-ci ildə bu iddianı rədd edib, lakin bu hekayə mobil rabitənin beyin xərçənginə səbəb ola biləcəyi ilə bağlı ictimai fərziyyələrə səbəb olub.

Daha sonra, 2011-ci ildə ÜST, Beynəlxalq Xərçəng Araşdırmaları Agentliyi (IARC) ilə birlikdə mobil telefon radiasiyasını mümkün insan kanserogeni kimi təsnif edib və 2016-cı ildə gəmiricilər üzərində aparılan bir araşdırma göstərib ki, telefonlardan gələn radiasiya siçanlar və siçovullarda beyin və adrenal xərçəngə səbəb olur.

Yeni araşdırma 5000-dən çox əvvəlki araşdırmanı təhlil edir, onlardan 63-ü ətraflı təhlil edilib. Məlum olub ki, son 20 ildə mobil telefonlardan istifadənin artmasına baxmayaraq, 10 ildən artıqdır ki, aktiv mobil telefon istifadəçiləri arasında belə beyin xərçəngi və ya digər növ baş-boyun xərçəngi hallarında artım müşahidə olunmayıb.

Bu araşdırmaya görə, mobil qüllələrdən və insanların daha yüksək dozada radiotezlik radiasiyasına məruz qaldığı müəyyən iş növlərindən gələn radio dalğalarının təsiri də aşkar edilməyib.

Tədqiqat onu da təsdiq edir ki, mobil telefonlardan istifadə artıq geniş yayılsa da, dünyada beyin xərçənginə tutulma halları 1982-ci ildən stabil olaraq qalır. Buna görə də, bu araşdırma simsiz texnologiyalardan gələn radiotezlik radiasiyasının insan sağlamlığı üçün təhlükə yaratmadığı qənaətinə gəlib.