Paltaryuyan maşının güclü səs çıxarması, titrəməsi və yerindən tərpənməsi həmişə nasazlıq əlaməti deyil. Bəzən problem cihazın döşəmədə düzgün yerləşdirilməməsi ilə bağlı olur.
Lent.az xarici mediaya istinadən xəbər verir ki, cihazın ayaqları döşəməyə tam oturmadıqda və ya gövdəsi əyri dayandıqda sıxma zamanı tarazlıq pozula bilər. Nəticədə maşın silkələnir, səs salır və tədricən yerindən sürüşür.
Davamlı güclü titrəmə həm cihazın hissələrinə, həm də döşəmə örtüyünə zərər verə bilər. Buna görə problemi diqqətsiz qoymaq olmaz.
Düzgün dayandığını necə yoxlamaq olar?
Yoxlamadan əvvəl maşını söndürüb elektrik şəbəkəsindən ayırın. Barabanı boşaldın və üstündəki əşyaları götürün.
Cihazın düz dayanmasını yoxlamağın ən etibarlı üsulu tikinti səviyyəölçənindən istifadə etməkdir. Aləti maşının üst səthinə qoyaraq əvvəl sağdan sola, sonra öndən arxaya istiqamətdə yoxlama aparın.
Gövdənin künclərindən yüngülcə basaraq sabitliyini də yoxlamaq olar. Maşın yırğalanırsa, ayaqlardan biri döşəməyə tam oturmaya bilər. Lakin yırğalanmaması onun tam düz dayandığını göstərmir.
Ayaqlar necə tənzimlənir?
Maşının istifadə təlimatına uyğun olaraq ayaqların bərkidici qaykalarını boşaldın və hündürlüyünü tənzimləyin. Hər dəyişiklikdən sonra səviyyəni və sabitliyi yenidən yoxlayın.
Bütün ayaqlar döşəməyə möhkəm oturmalı, gövdə yırğalanmamalıdır. Tənzimləmə başa çatdıqdan sonra qaykaları yenidən sıxmaq lazımdır. Cihazla divar və ətraf mebel arasında təlimatda göstərilən məsafə də saxlanmalıdır.
Maşın altlıq üzərindədirsə və ya üstündə quruducu yerləşdirilibsə, onu özbaşına qaldırıb təsadüfi əşyalarla dayaq yaratmaq təhlükəlidir. Belə hallarda quraşdırma təlimatına uyğun hərəkət etmək və mütəxəssis köməyindən yararlanmaq daha məqsədəuyğundur.
Ayaqlar düzgün tənzimlənsə də, güclü titrəmə davam edirsə, səbəb başqa ola bilər. Bu halda cihazın texniki yoxlanılması lazımdır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
