Keçmiş işçiləri İlon Maskı MƏHKƏMƏYƏ VERDİ

İlon Maskı "Twitter"in 6 keçmiş işçisi müqavilənin pozulması, əmək şəraitinin pozulması və bir sıra fırıldaqçılıq hallarına görə məhkəməyə verib.

Lent.az-ın xarici mediaya istinadla xəbərinə görə, iddiaçıların iddiaları siyahısında milyarderin şirkətin baş ofisini “otel”ə çevirmək istəyi ayrıca bənd kimi qeyd edilib.

Məlumdur ki, 2022-ci ilin oktyabrında, "Twitter"i aldıqdan dərhal sonra Mask ofis sahəsini gecəyə qədər işdə qalacaq işçilər üçün yataq otağına çevirməyi əmr edib. "Twitter"in baş qərargahının yerləşdiyi San-Fransisko Binalar Departamenti bundan xəbər tutaraq Maskdan belə ehtiyaclar üçün tam hüquqlu yataq otaqlarını təchiz etməyi tələb edib.

Şirkətin keçmiş işçilərindən biri Cozef Killian yataq otaqlarının şəhər qanunlarına uyğun təchiz edilməsinə cavabdeh idi. Rəhbərləri ilə söhbətində o, yanğın siqnalı işə düşəndə otaqlara avtomatik açılmayan qıfılların daxil olacağından narahat olduğunu bildirib. Sonra o, "işçilərin həyatını təhlükəyə atacaq" qıfılların quraşdırılmasından imtina etdiyi üçün istefa verməyə məcbur olub.

İndi keçmiş “Twitter” əməkdaşları Maskı apardığı islahatlara, eləcə də məcburi işdən çıxarılmasına görə məhkəməyə vermək niyyətindədirlər. Məlumdur ki, San-Fransisko hakimiyyəti milyarderin fəaliyyəti ilə bağlı artıq müvafiq araşdırmaya başlayıb.