Böyük ekranlı smartfonlar geniş yayılsa da, bir əllə rahat istifadə edilən və cibdə az yer tutan modellərə maraq qalır. BGR nəşri kompakt telefon axtaranlar üçün müxtəlif qiymət kateqoriyalarından beş Android modeli seçib.
Lent.az xarici mediaya istinadla xəbər verir ki, seçim zamanı ekranın ölçüsü ilə yanaşı, batareyanın işləmə müddəti, şarj sürəti, kameralar və proqram yeniləmələrinin müddəti nəzərə alınıb.
Siyahıda kiçik ekranlı cihazlarla yanaşı, qatlandıqda az yer tutan bir model də var. Göstərilən qiymətlər xarici bazarlara aiddir və satış yerindən asılı olaraq dəyişə bilər.
Google Pixel 10a
Nəşr bu modeli gündəlik istifadə üçün kompakt seçimlərdən biri kimi təqdim edir. Telefonun ölçüləri 153,9 × 72,9 × 8,9 millimetr, çəkisi isə təxminən 183 qramdır.
Smartfon 120 hers yenilənmə tezliyinə malik 6,3 düymlük P-OLED ekranla təchiz olunub. Ekranın maksimal parlaqlığı 3000 nit təşkil edir. Tensor G4 prosessoru və 8 GB operativ yaddaş gündəlik işlər, oyunlar və video redaktəsi üçün nəzərdə tutulub.
Əsas kamera 48, genişbucaqlı kamera isə 13 meqapikseldir. Gemini əsaslı funksiyalar foto və videoların təkmilləşdirilməsinə kömək edir. Batareyanın tutumu 5100 milliamper-saatdır.
Məqalədə cihaz üçün yeddi il Android və təhlükəsizlik yeniləmələrinin nəzərdə tutulduğu bildirilir. 128 GB yaddaşlı versiyanın qiyməti 599, 256 GB versiyanın qiyməti isə 699 dollar göstərilir.
Bluefox NX1
Siyahının ən kiçik modeli 4 düymlük LCD ekrana malik Bluefox NX1-dir. Təxminən 106 qram çəkisi olan telefon bir əllə istifadəyə uyğundur.
Cihaz Helio G81 prosessoru və Android 15 sistemi ilə işləyir. 3000 milliamper-saatlıq batareyanın səkkiz saata qədər video izləməyə imkan verdiyi bildirilir.
Əsas kamera 20, ön kamera isə 5 meqapikseldir. Şarj gücü 10 vatla məhdudlaşır. Telefonda USB-C girişi və 2 TB-dək microSD yaddaş kartı dəstəyi var.
4 GB operativ və 64 GB daxili yaddaşlı versiya təxminən 130 dollara, 8 GB operativ və 128 GB daxili yaddaşlı variant isə 170 dollara təklif olunur.
Moto Razr+ 2024
Böyük ekrandan imtina etmədən cibdə az yer tutan telefon istəyənlər üçün siyahıya qatlanan Moto Razr+ 2024 daxil edilib.
Modelin daxili ekranı 6,9, xarici ekranı isə 4 düymdür. Snapdragon 8s Gen 3 prosessoru ilə təchiz olunan cihaz IPX8 standartına uyğun suya davamlılığa malikdir.
4000 milliamper-saatlıq batareya 45 vat naqilli və 15 vat simsiz şarjı dəstəkləyir. Əsas kamera və telefoto kamera ayrı-ayrılıqda 50 meqapiksel təsvir ölçüsünə malikdir.
Nəşrdə modelin çatışmazlığı kimi proqram dəstəyinin müddəti göstərilir. Android 14 ilə satışa çıxarılan telefon üçün üç əsas Android yeniləməsi və dörd il təhlükəsizlik yeniləməsi nəzərdə tutulub.
OnePlus 13s
OnePlus 13s kiçik korpusda yüksək performans axtaranlar üçün təqdim olunur. Smartfon 120 hers yenilənmə tezliyinə malik 6,32 düymlük AMOLED ekran və Snapdragon 8 Elite prosessoru ilə təchiz edilib.
Əsas və telefoto kameraların hər biri 50, ön kamera isə 32 meqapikseldir. Batareyanın tutumu 5850 milliamper-saatdır və 80 vat sürətli şarj dəstəyi var. Uyğun şarj adapteri də qutuya daxildir.
Telefon Android 15 əsaslı OxygenOS 15 sistemi ilə işləyir. Məqalədə model üçün üç əsas Android yeniləməsi və altı il təhlükəsizlik dəstəyi göstərilir.
12 GB operativ və 256 GB daxili yaddaşlı versiyanın qiyməti təxminən 556 dollar qeyd olunur.
Motorola Edge 60 Neo
Siyahıdakı digər model 6,36 düymlük P-OLED ekranlı Motorola Edge 60 Neo-dur. Ekran 120 hers yenilənmə tezliyini və HDR10+ texnologiyasını dəstəkləyir.
Dimensity 7400 prosessoru ilə işləyən telefonun əsas kamerası 50 meqapikseldir. Bundan başqa, 13 meqapiksellik genişbucaqlı kamera və üçqat optik yaxınlaşdırmaya malik 10 meqapiksellik telefoto kamera var. Ön kameranın təsvir ölçüsü 32 meqapikseldir.
5000 milliamper-saatlıq batareya 68 vat naqilli və 15 vat simsiz şarjı dəstəkləyir. Cihazda IP69 standartına uyğun su və tozdan qorunma, həmçinin Moto AI, Gemini və Circle to Search funksiyaları mövcuddur.
8 GB operativ və 256 GB daxili yaddaşlı versiyanın qiyməti məqalədə təxminən 300 dollar göstərilir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
