Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasında ABŞ-ın Şərq-Qərb İnstitutunun rəsmiləri ilə görüş keçirilib.
Şuranın mətbuat xidmətindən Lent.az-a verilən məlumata görə, görüşün keçirilməsində məqsəd reallaşdırılan “Sosial-iqtisadi inkişaf layihəsi” (SEDA) çərçivəsində Şura ilə İnstitut arasındakı münasibətləri müzakirə etmək olub.
Şərq-Qərb İnstitutunun prezidenti Adrian Hyurik bu yaxınlarda əməkdaşlıq çərçivəsində memorandumun imzalanması mərasimini yüksək səviyyədə təşkil etdiyinə görə Şura rəhbərliyinə təşəkkürünü bildirib. O qeyd edib ki, başçılıq etdiyi qurum bundan sonra SEDA layihəsi çərçivəsində Şura ilə birgə fəaliyyət göstərəcək. Adrian Hyurik vurğulayıb ki, bu sahədə iş planının hazırlanması və icra olunmasında da əməkdaşlıq edəcəklər.
Xatırladaq ki, bu il aprelin 17-də Şura ilə ABŞ-ın Beynəlxalq İnkişaf Agentliyi (USAİD) arasında “Birgə əməkdaşlıq haqqında Anlaşma Memorandumu” imzalanıb. Əməkdaşlığın məqsədi ümumi icma yönümlü regional sosial-iqtisadi inkişafda vətəndaş iştirakçılığının gücləndirilməsi, QHT-lərlə hökumət və özəl sektoru təmsil edən tərəfdaşların əlaqələndirilmiş şəbəkəsinin yaradılması vasitəsilə ölkədə vətəndaş cəmiyyətinin möhkəmləndirilməsidir.