Qənirə Paşayeva Tailandda yaşayan müsəlman icması ilə görüşüb

Tailandda səfərdə olan millət vəkili Qənirə Paşayeva bu ölkədə yaşayan müsəlman icmasının rəsmiləri ilə görüşüb. Lent.az-ın məlumatına görə, görüşdə Ermənistanın işğalçılıq siyasəti ilə bağlı geniş məlumatlar verən millət vəkili 1 milyon azərbaycanlının Ermənistanın işğalı nəticəsində öz yurd-yuvalarından qaçqın və məcburi köçkün düşməsi, onların fundamental insan haqlarının bu gün də Ermənistan tərəfindən pozulmaqda davam etməsi, Xocalı Soyqırımı barədə ətraflı məlumatlar verib.

Q. Paşayeva Tailandda Azərbaycan həqiqətlərinin daha da geniş şəkildə bilinməsinə və daha da geniş dəstəklənməsinə hər zaman böyük ehtiyac olduğunu qeyd edib.

Millət vəkili Tailandın müsəlman icması rəsmisi Mayo Suttikan və icma üzvlərini hər zaman Azərbaycanda görməkdən məmnunluq duyacaqlarını deyərək onları Azərbaycana dəvət edib. “Azərbaycanı böyük məmnuniyyətlə yaxından tanımaq və əməkdaşlığı daha da genişləndirməkdə maraqlı olduqlarını”, deyən M. Suttikan və icma üzvləri ölkələri ilə Azərbaycan arasında əməkdaşlığın daha da inkişafı və Qarabağ həqiqətlərinin təbliğində bundan sonra səylərin artıracaqlarını deyiblər.

Görüşün sonunda Q. Paşayeva Tailand müsəlman icması rəhbərliyi və üzvlərinə Azərbaycan tarixi, ədəbiyyatı və mədəniyyəti ilə bağlı materiallar, tanınmış modelyer Gülnarə Xəlilovanın Azərbaycan mədəniyyətini özündə əks etdirən əl işini hədiyyə edib.