Ombudsmanla MSK Füzulidə tədbir keçirib

İnsan hüquqları üzrə müvəkkil Elmira Süleymanova Mərkəzi Seçki Komissiyası (MSK) ilə birgə seçki hüququ ilə bağlı növbəti tədbiri Füzuli rayonunda keçirib. Ombudsman Aparatından APA-ya verilən məlumata görə, tədbirdə MSK-nın əməkdaşı İlham Yusifov, Füzuli rayon İcra Hakimiyyətinin, məhkəmə, prokurorluq və polis orqanlarının, dairə və məntəqə seçki komissiyalarının, bələdiyyələrin nümayəndələri, təhsil, səhiyyə və mədəniyyət müəssisələrinin əməkdaşları, yerli qeyri-hökumət təşkilatlarının, KİV-in və icmaların təmsilçiləri, qaçqın və məcburi köçkünlər iştirak ediblər.

Tədbirin sonunda E. Süleymanova Ombudsman təsisatının və MSK-nın “qaynar xət”ləri barədə məlumat verərək müraciətlərə dərhal baxıldığını və səlahiyyətləri çərçivəsində həll olunduğunu vurğulayıb.

Tədbirdən sonra müvəkkil müraciətləri olan şəxsləri dinləyərək problemlərini öyrənib, hüquqlarını izah edib, bəzi müraciətlər müsbət həll olunub.

Səfər çərçivəsində Ombudsman MSK-nın nümayəndəsi və rayon rəhbərliyi ilə birgə 84 saylı Füzuli DSK-nın binasına, xidməti otaqlarına, həmçinin iclas zalına və digər yerlərə baxış keçirib. Komissiyanın fəaliyyəti, seçki hüquqları üzrə əlaqədar nəşrlər və plakatların vəziyyəti öyrənilib, adı çəkilən hüquqlarla əlaqədar tövsiyələr verilib.