Əsl polkovnik haqqında ballada - RAQUF ORUCOVUN DOĞUM GÜNÜNƏ...

Bu gün Onun doğum günüdür. Aprel döyüşlərində şəhid olan polkovnik-leytenant Raquf Orucovun. Yaşasaydı, 44 yaşı tamam olacaqdı. Amma 4-ləri qoşalaşdırmadan bu dünyanı tərk etdi. Çünki canından artıq sevdiyi Vətən torpağını qanı ilə suvarmağı özünə borc bildi...

APA TV-nin xəbərinə görə, bu gün Sumqayıt Şəhər İcra Hakimiyyətinin və cəbhə yoldaşlarının təşkilatçılığı ilə şəhid polkovnik-leytenant Raquf Orucovun doğum günü qeyd olunub.

Üzərində Azərbaycan bayrağı və şəhid Raquf Orucovun cəbhə bölgələrində çəkdirdiyi şəkillərlə bəzədilən avtomobil karvanı Bakının "20 Yanvar" dairəsindən Sumqayıt şəhərinə yola düşüb.

Raquf Orucovun kiçik oğlu və məktəblilər özləri ilə gətirdikləri qərənfilləri Sumqayıtın Şəhidlər Xiyabanında ucaldılan abidənin önünə qoyublar.

Daha sonra şəhid polkovnik-leytenantın əsgər yoldaşları, qardaşı Zabil Orucov onun döyüş yolundan, Talış kəndi istiqamətindəki düşmən postunu bir neçə əsgərlə xüsusi peşəkarlıq və şücaət göstərərək ələ keçirməsindən danışıblar.

Qeyd edək ki, polkovnik-leytenant Raquf Orucov aprelin 4-də gedən döyüşlərdə qəhrəmancasına həlak olub. O, aprelin 5-də böyük hörmət və ehtiramla Sumqayıt Şəhidlər Xiyabanında dəfn olunub. Həyat yoldaşı Sevinc Orucovanın dediyinə görə, sağlığında demək olar ki, heç vaxt ad günü keçirməyib: "Yaşasaydı, 44 yaşı olacaqdı. Kiçik oğlu indi də onun ölümünü qəbul etmir. İkinci dəfədir bura gəlir. Böyük hardasa başa düşür, qəbul edir. Balaca isə deyir danışmayın, gələcək. Həmişə elə olub axı. Gedirdi, iki-üç ay gəlmirdi. Amma sonda gəlirdi".

Raquf Orucov özünün iki əsgəri ilə yanaşı uyuyur - biri sağında, biri solunda. Polkovnik-leytenantın xatirəsini ananlar şəhid Seymur Qulamhüseyn oğlu Baxışovun da məzarına qırmızı qərənfillər düzürdülər. Sən demə, əsgər Seymur Baxışov da komandiri Raquf Orucov kimi 12 iyulda doğulubmuş.

Allah rəhmət eləsin!