DSMF-da Heydər Əliyevin ildönümünə həsr olunmuş tədbir keçirilib

Dövlət Sosial Müdafiə Fondunda (DSMF) ümummilli lider Heydər Əliyevin anadan olmasının 92-ci ildönümünə həsr olunmuş tədbir keçirilib.

Fondun İctimaiyyətlə əlaqələr sektorundan Lent.az-a verilən məlumata görə, tədbirdə çıxış edən Dövlət Sosial Müdafiə Fondunun sədri Elman Mehdiyev böyük dövlət xadimi, müstəqil Azərbaycan dövlətinin memarı Heydər Əliyevin zəngin siyasi təcrübəsi və dövlətçilik fəaliyyəti barədə məlumat verib. Heydər Əliyevin dövlət quruculuğu fəlsəfəsinin başlıca elementinin məhz sosial rifah olduğunu qeyd edən Fond sədri onun ölkədə yeni cəmiyyət modeli quruculuğunda, milli həmrəyliyin formalaşmasında və inkişafında göstərdiyi misilsiz xidmətlərdən, əsasını qoyduğu milli tərəqqi və sosial dövlət konsepsiyasından bəhs edib.

E. Mehdiyev vurğulayıb ki, ölkə prezidenti İlham Əliyev tərəfindən Heydər Əliyevin inkişaf strategiyasının uğurla davam etdirilməsi nəticəsində Azərbaycanın ictimai-siyasi həyatının bütün sahələrində genişmiqyaslı dəyişikliklər baş verib, dayanıqlı makroiqtisadi sabitlik və davamlı iqtisadi artım təmin olunub, regionun lider dövlətinə çevrilən respublikamız dünyanın sürətlə inkişaf edən ölkələri sırasında öz layiqli yerini tutub.

Beynəlxalq aləmdə nüfuzu durmadan artan, özünəməxsus milli inkişaf modeli ilə tanınan, qlobal layihələrin təşəbbüskarı və icraçısı rolunda çıxış edən dövlətimiz dünyada, xüsusən də bölgədə gedən proseslərdə kifayət qədər geniş təsir imkanlarına malikdir.