Bölgələrdə istirahət neçəyədir? - XÜSUSİ REPORTAJ

Yay mövsümü başlar-başlamaz məzuniyyətlər də başlayır. İstirahət etmək üçün hər kəs plan qurur və gedəcəyi yerləri müəyyənləşdirir. Amma hələ də bu barədə düşünməyənlər də var.

Bir çoxlarının isə qiymətlərdən xəbəri yoxdur. Əsas da regionlara üz tutmaq istəyən vətəndaşların. Bəs görəsən, bölgələrdə turizm hansı səviyyədədir, qiymətlər necədir? Bütün bu suallara cavab tapmaq üçün APA TV-nin regionlardakı müxbirləri araşdırma aparıb.

İlk olaraq şimal bürosunun rəhbəri Vəli Turan bölgədəki turizm məkanları ilə maraqlanıb. Bildiriblər ki, Quba rayonunda 4 istiqamət üzrə - Quba-Xınalıq, Quba-Ləzə, Quba-Afurca, Quba-Xanəgah turizm marşrutları fəaliyyət göstərir. Hər bir istiqamətə qiymətlər məsafədən, xidmətlərin sayından, qrup və ya fərdi halda istirahətdən asılı olaraq dəyişir. Belə ki, 1 turistin 1 günlük xərci təxminən 60 manat təşkil edir. Bu qiymət 2 nəfər üçün 80, 4 nəfər üçün isə 120 manatdır. Bəzi istirahət mərkəzlərində qiymətlər 30 manatdan başlayır. Bu il bu qiymətlərə səhər yeməyi də əlavə olunub.

Xaçmazda qiymətlər Qubadan fərqlənmir. Nabranda dincəlmək istəyənlər bir gün üçün 35-70 manatlarından keçməlidirlər. Fərdi yaşayış evlərinə üstünlük verənlər isə evin yerləşmə yeri və sahəsindən asılı olaraq günü 50 manatdan 500 manata kimi xərcə düşəcək.

Əməkdaşımız Vüqar Heydərov isə şimal-qərb bölgəsindəki qiymətləri öyrənib. Qax rayon Mədəniyyət və Turizm Şöbəsindən bildiriblər ki, turistlərin böyük əksəriyyəti digər bölgələrdən və paytaxtdan gələn yerli turistlərdir. Qax rayonunda 12 ailəvi istirahət mərkəzi fəaliyyət göstərir ki, onlardan 2-si şəhər ərazisində, 10-u isə rayonun İlisu və Qaxbaş kəndlərində yerləşir.

Bu zonada fəaliyyət göstərən hotel və istirahət mərkəzlərindən bildirilib ki, hazırda istirahətə gələn turistlərin sayı çox azdır. Hotellərdən birinin satış meneceri Yusif Şahidovun verdiyi məlumata görə, hoteldə bir gün gecələmək üçün qiymətlər otaqların tipindən və turistin sayından asılı olaraq 2 nəfərlik otaq 140 manatdan 4-5 nəfərlik otaq 256 manata qədər dəyişir: "Bizdə bu korpus 3 mərtəbə, 52 otaqdan ibarətdir. İkinci korpus da var. İkinci korpusumuz 82 otaqdan ibarətdir. 2 nəfərlik və 4 nəfərlik otaqlar var. Bizdə daha çox xarici ölkələrdən qruplar olur".

İstirahət mərkəzlərində bir gün gecələmək isə 30-40 manat civarındadır. Bu qiymətə yalnız səhər yeməyi daxildir. Turistlər günorta və şam yeməyini istirahət mərkəzlərində yesə, hər yemək üçün çeşidindən asılı olaraq 10-20 manat arasında əlavə pul ödəməlidirlər.

Bu bölgədə fəaliyyət göstərən digər istirahət mərkəzinin inzibatçısı isə bildirib ki, otaqların qiyməti 80-350 manat arasında dəyişir: "350 manatlıq otaqlar super-VİP otaqlardır. Bu otaqlarda iki yataq otağı, otaqda əlavə bir qonaq otağı, bir də sauna var. Hoteldə 150 nəfəri tam rahat bir şəraitdə qarşılaya biləcək şəraitimiz var. 39 otaq fəaliyyət göstərir. 2 nəfərlik otaqlar 80 manatdan başlayır. Bura səhər yeməyi və əlavə olaraq gəzinti turları daxildir. Bundan başqa, gələn qonaqların, uşaqların istirahətinin xoş keçməsi üçün mini-atraksionlar və uşaq bağçası da fəaliyyət göstərir".

Şəki rayon Mədəniyyət və Turizm Şöbəsindən bildirilib ki, hazırda rayon ərazisində 12 hotel və istirahət mərkəzi fəaliyyət göstərir. Bunlardan 4 hotel şəhərdə, 7 istirahət mərkəzi Kiş kəndində, 1 istirahət mərkəzi isə Baş Küngüt kəndində fəaliyyət göstərir. Məlumatda bildirilir ki, rayona gələn turistlərin bir gün gecələməsi onlara otaqların tipindən asılı olaraq 20-80 manata başa gəlir.

Cənub bölgəsi üzrə müxbirimiz Ağəddin Babayev isə bildirib ki, builki mövsümdə Lənkəranın turizm obyektlərinin əksəriyyətində qiymətlərdə bir sıra endirimlər tətbiq olunub.

İstirahət mərkəzlərindən birinin meneceri Fuad İsmayılzadənin sözlərinə görə, onun çalışdığı obyekt turizm mövsümü üçün lazım olan bütün hazırlıq işlərini başa çatdırıb. Hər bir turistin istirahəti üçün standart qiymətlər müəyyən olunub: "Bütün hazırlıq işlərini tamamlamışıq. Dəniz, hovuz və hotelin bütün xidmətləri hazırlıq vəziyyətinə gətirilib. Bir nəfərin sutka ərzində hoteldə qalıb istirahət etməsi üçün 50 manat müəyyənləşdirilib. Buraya bütün xidmətlər, o cümlədən səhər yeməyi daxildir".

Fuad İsmayılzadə deyib ki, keçən ilki qiymətlər indikindən bir qədər baha olub. Ona görə bu il 15-20 faiz endirim tətbiq edilib.

Lənkəranda digər istirahət mərkəzinin baş meneceri Elman Əliyevin sözlərinə görə, hoteldə otaqlardakı şəraitdən asılı olaraq qiymətlər 40 manatdan 150 manata qədər dəyişir. Amma heç bir qiymət artımı tətbiq olunmur: "Bu qiymətlərə həmçinin gündə 3 dəfə yemək də daxildir. Bundan başqa, qonaqların dincəlməsi üçün də yüksək səviyyədə əyləncələr təşkil olunub".

Lənkəranın turizm obyektlərində hələlik xarici turistlərə rast gəlinməsə də, paytaxt Bakıdan bura ailəvi istirahətə gələnləri sayı kifayət qədərdir. Onları bura cəlb edən isə ərazidə dəniz, dağ və meşə faktorunun olmasıdır: "Mən ildə bir neçə dəfə bu istirahət mərkəzində dincəlirəm. Buradakı şəraitdən çox razıyam. İnsanın dincəlməsi üçün burada hər cür şərait yaradılıb. Buradakı dəniz, təmiz hava adama ruh verir. Qiymətlər də çox münasibdir. Gələn il də hökmən gələcəyəm".

Məlumat üçün deyək ki, Lənkəranda lisenziya almış 11 turizm obyekti fəaliyyət göstərir. Ötən il rayona gələn turistlərin sayı 16 mindən artıq olub, bunun 12%-ni  əcnəbi turistlər təşkil edib. Bu ilin 6 ayı ərazində isə 7 minə yaxın turist rayona gələrək istirahət edib.

Qərb bölgəmizin müxbiri Azər Məmmədli istirahət mərkəzlərindən aldığı məlumata əsasən deyib ki, bu il qərb bölgəsində turizm sahəsində vəziyyət heç də ürək açan deyil. Bir neçə səbəbdən bu il hələ ki, turistlərin istirahət mərkəzlərinə kütləvi axını müşahidə edilmir. Başlıca səbəb isə hava şəraitinin sərin və yağmurlu keçməsidir.

İstirahət mərkəzlərindən bildirilib ki, devalvasiya nəticəsində bir sıra məhsullarda müəyyən qiymət artımları müşahidə olunsa da, onlar qiymətlərini dəyişməyiblər. Qiymətlər demək olar ki, əvvəlki illərdən heç də fərqlənmir. Bir ailə sutka ərzində 150 manatla rahat şəkildə burda dincələ bilər. 80 manat qalma pulu, 70 manat isə yemək puludur.

Bəzi istirahət mərkəzləri isə müştəri cəlb etmək üçün bəzi güzəştlər də ediblər: “Keçən il 5 nəfərlik ailə gəlib qalanda 80 manat pul ödəyirdi, səhər yeməyi daxil deyildi. Amma bu il 80 manata səhər yeməyini də daxil eləmişik".

Göygöl rayonun Aşıqlı, Hacıkənd, Toğanalı kəndlərində fərdi yaşayış evlərini turistlərə kirayə verənlər də var. Onlardan biri də Ələsgər Verdiyevdir. O, bir necə ildir ki, yay mövsümündə evini turistlərə kirayə verir: “Bu il sərinliyə görə gec gəlirlər. İsti olanda çox gəlirlər. Evin özünü 20-25 manata kirayə veririk. Yeməkləri də 20 manat tutur. Təxminən 40 manata başa gəlir”.

Şirvan bölgəsi üzrə müxbirimiz Elvin Yaqubovun verdiyi məlumata görə, Qəbələ rayonunda hazırda irili-xırdalı 100-ə yaxın turizm-istirahət obyekti fəaliyyətdədir. Həmin obyektlərdən 20-si beş, dörd və üç ulduzlu hotellər və müasir istirahət mərkəzləridir. Bu turizm obyektlərində gün ərzində 2500 qonağı qarşılamaq, onlara yüksək səviyyədə xidmət göstərmək mümkündür.

Rayonda hotel və restoran xidmətlərinə görə qiymətlər ötən illə müqayisədə aşağı salınıb. Keçən il rayondakı otellərdə ikinəfərlik ən ucuz nömrə 90 manat idisə, bu ildən həmin otaqlar müştərilərə 80 manata təklif edilir.

Hotelin müştəri xidmətləri üzrə məsul şəxs Zəka Kərimov: "Hotelimiz 63 nömrədən ibarətdir. Orta qonaq tutumu 126 nəfərdir. Brendimizin əsas devizi "yüksək xidmət, xoş münasibət"dir. Qiymətlərimiz normaldır. Normal olduğuna görə həm daxili turistləri, həm xarici turistləri cəlb edirik. Keçən ilə nisbətən qiymətlərimiz çox münasibdir. Keçən il 2 nəfər üçün olan otağımız 90 manat idisə, indi həmin otaqlar 80 manatdır. Turistləri cəlb etmək üçün endirimlər edirik. Bayram kampaniyalarımız, xüsusi qruplar üçün xüsusi endirimlərimiz olur".

Regionda yerləşən bəzi hotellərdə isə 50 manatlıq otaqlar 35 manata təklif edilir. Qəbələyə ailəvi gələn və bir neçə gün rayonda qalıb dincəlmək istəyən turistlər əsasən meşə və çay kənarındakı kotteclərdə və kirayə verilən kənd evlərində istirahət etməyə üstünlük verirlər. Turistlər ötən il kənd evlərinə bir günlük 40 manat ödəyirdilərsə, bu il  bu rəqəm 20-30 manat arasında dəyişir. Belə ki, bu məbləğlə 4 nəfərlik ailə rahat şəkildə qalıb istirahət edə bilir.

Bölgədə ən çox turist qəbul edən “Tufandağ” Qış-Yay Turizm İstirahət Kompleksində kanatla dağ gəzintisinə dörd istiqamətə çıxmaq mümkündür. Dağlanın 2 min metr yüksəkliyində hotel və restoran xidmətləri, əyləncə mərkəzləri, göllərdə qayıqla gəzinti qonaqların ixtiyarına verilib.

Qeyd edək ki, ötən il Qəbələyə 50 350 nəfər yerli və xarici turist gəlib. Bu il turistlərin sayının daha çox olacağı gözlənilir.

Beləliklə, sizi bölgələrdəki turizm qiymətləri ilə tanış etdik sizi. Əliniz cibinizdə olsun! Xoş istirahətlər!