Bəzi ixtisaslar üzrə seçmə turlar ləğv edilib

Azərbaycan 9 illik təhsil bazadan orta ixtisas təhsili müəssiələrinə sənəd vermiş abituriyentlər üçün xüsusi qabiliyyət tələb edən bəzi ixtisaslar üzrə seçmə turlar ləğv edilib.

APA-nın xəbərinə görə, Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə bu gün keçirdiyi mətbuat konfransında qeyd edib ki, bu ildən etibarən Bədən tərbiyəsi və idman istiqamətinin, həmçinin Musiqi sənəti istiqamətinin “Musiqi müəllimliyi”, “Musiqi nəzəriyyəsi”, “Xor dirijorluğu”, “İnstrumental ifaçılıq (alətlər üzrə), “Xalq çalğı alətləri ifaçılığı (alətlər üzrə)” ixtisasları üzrə təhsil almaq istəyən abituriyentlər seçmə turda iştirak etmirlər. Lakin Azərbaycan Milli Konservatoriyası nəzdində Musiqi Kollecinin “İnstrumental ifaçılıq (alətlər üzrə)”, və “Xalq çalğı alətləri ifaçılığı (alətlər üzrə)” ixtisasları bu seçmə turlarda istisna hal kimi qeyd olunur. Abituriyentlər avqustun 5-dən 13-dək seçmə turlarda iştirak etməlidirlər. Seçmə turlar TQDK-nın təşkil etdiyi Yaradıcılıq Qabiliyyətinin Yoxlanılması Komissiyaları tərəfindən mərkəzləşdirilmiş qaydada keçirilir.

E. Nağızadə qeyd edib ki, orta ixtisas təhsili müəssisələrinə ümumi orta təhsil bazasında (9 illik) ərizə qəbulu iyulun 17-dən başlanıb. Onun sözlərinə görə, bu günə kimi 2500-dək abituriyent sənəd verib: “Bu il bəzi abituriyentlər elektron ərizələrini Sənəd Qəbulu Komissiyalarına (SQK)müraciət etmədən elektron ərizə səhifəsindəki müvafiq düyməni basmaqla özləri təsdiq edirlər. Bunlara 2012/2013-cü tədris ilində Azərbaycan Respublikasının ümumi və ilk-peşə ixtisas təhsili müəssisələrinin 9-cu, 10-cu və 11-ci siniflərini bitirən abituriyentlər, 2011/2012-ci və 2012/2013-cü tədris illəri üçün Azərbaycan Respublikasının ali təhsil müəssisələrinin bakalavriat səviyyəsinə, tam və ümumi orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün ərizə verib onu təsdiq etdirmiş abituriyentlər daxildir. Digər abituriyentlər elektron ərizələrini tələb olunan sənədləri təqdim etməklə Bakı şəhəri 42 nömrəli tam orta məktəbində və TQDK-nın regional bölmələrində yaradılmış SQK-larda təsdiq etdirirlər.

Qeyd edək ki, ümumi orta təhsil bazasında orta ixtisas təhsili müəssisələrinə keçiriləcək qəbul imtahanlarında iştirak etmək üçün iyulun 17-dən avqustun 15-dək internet vasitəsilə ərizə qəbulu aparılır. 9 illik təhsil bazasında orta ixtisas təhsili müəssisələrinə qəbul imtahanı isə avqustun 25-də keçiriləcək.