Bakıda üçmərtəbəli uşaq bağçası tikilir

Səbail rayonunda yeni uşaq bağçası tikilir. Lent.az xəbər verir ki, Səbail rayon İcra Hakimiyyəti tərəfindən 2016-cı ilin ilinin sonunda Bayıl yaşayış sahəsi, Xanlar küçəsində 100 il əvvəl inşa olunmuş və qəzalı vəziyyətdə olan binada yerləşən, 100-dən çox uşağın tərbiyə aldığı 157 saylı uşaq bağçasının əsaslı təmirinə başlanılması barədə qərar verilib.

Səbail RİH Aparatının İctimai-siyasi və humanitar məsələlər şöbəsinin müdir müavini İsrafil Kərimov bildirib ki, bağçanın köhnə və qəzalı binada yerləşməsi və bununla da təmir işlərinin çətinləşməsi ilə əlaqədar RİH tərəfindən bu binanın sökülərək yenində müasir standartlara tam cavab verən layihə sənədləri əsasında yenidən tikilməsinə qərar verilib:

“Keçən müddət ərzində köhnə bina sökülüb, yeni, 3 mərtəbəli, əvvəlkindən daha geniş, daha çox sayda uşaq qəbul edə biləcək yeni bağça tikilir. Hazırda burada tikilən binanın daxilində işlər gedir. Daxili dizayn işlərinə başlanıb. Burada uşaqların tərbiyəsi və istirahəti üçün hər cür şərait yaradılacaq və yeni bağçanın açılışı cari ilin sentyabr-oktyabr aylarına planlaşdırılıb”.