Milli Qəhrəman Namiq Abdullayevin xatirəsinə şeir müsabiqəsi keçirilib

Milli Qəhrəman Namiq Abdullayevin ad günü münasibətilə onun adını daşıyan Ağcabədi rayonunun Yuxarı Avşar kənd orta məktəbində şagirdlər arasında şeir müsabiqəsi keçirilib. Lent.az-ın məlumatına görə, görüşdə qəhrəmanın ailə üzvləri, döyüş yoldaşları və rayon ictimaiyyətinin nümayəndələrinin iştirak edib.

Tədbirdə çıxış edənlər onun qəhrəmanlıqla dolu döyüş yolundan danışıblar. Bildiriblər ki, Abdullayev Namiq Vahid oğlu 10 may 1974-cü ildə Ağcabədi rayonunun Avşar kəndində anadan olub. 1991-ci ildə Avşar kənd orta məktəbini bitirən Namiq, 1992-ci ilin dekabrında cəbhəyə yollanaraq Vətənimizin müdafiəsində iştirak edib. 1993-cü il fevralın 9-da Xocavənd rayonu istiqamətində gedən döyüşlərdə ermənilərin bir neçə texnikasını və xeyli canlı qüvvəsini məhv edərək qəhrəmancasına həlak olub. Prezident H. Əliyevin 1994-cü il 16 sentyabr tarixli fərmanı ilə ölümündən sonra Azərbaycanın Milli Qəhrəmanı adına layiq görülüb. Vaxtilə təhsil aldığı Avşar kənd orta məktəbi hazırda qəhrəmanın adını daşıyır.

Milli Qəhrəmanın müəllimləri Namiq haqqında danışaraq bildirdilər ki, o olduqca çevik bacarıqlı şagird və sədaqətli dost olub: “Oxuduğu müddətdə, Namiq xüsusi fərqlənib. O, yaxşı oxumaqla bərabər həm də yoldaşları arasında səmimi idi. Elə bunun nəticəsidir ki, 1992-ci ildə könüllü müharibəyə getdi və canından çox sevdiyi vətəni uğrunda cəsarətlə şəhid olub”.

Çıxışlarda Azərbaycanın ərazi bütövlüyü uğrunda həyatını fəda edərək şəhidlik zirvəsinə ucalmış Namiq Abdullayevin timsalında şəhidlərimizin cəsurluğu və rəşadətini vətənini sevən hər kəs üçün örnək kimi dəyərləndirib. Mərasimdə həmçinin Milli Qəhrəmanın adını daşıyan orta məktəbin şagirdləri arasında keçirilən şer müsabiqəsinə yekun vurulub. Onun və eləcədə digər şəhidlərimizə həsr edilən şeir müsabiqəsinin şərtlərinə uyğun olaraq şagirdlər söylədikləri şeirləri intonasiya və qiraət qaydalarına uyğun olaraq səsləndirdilər. Vətən uğrunda şəhid olan oğlan və qızlarımıza həsr edilən şeirləri söyləyən şagirdlər Rayon Təhsil Şöbəsinin və qabaqcıl ədəbiyyat müəllimlərindən ibarət münsiflər tərəfindən qiymətləndiriblər. Şer müsabiqəsində fərqlənənlərə RİH və Təhsil Şöbəsinin fəxri fərmanları təqdim edilib.