700 bal toplayan abituriyent: "Gecə birə qədər dərs oxuyurdum"

IV ixtisas qruplarının abituriyentləri (cari ilin məzunları) üçün keçirilən qəbul imtahanlarında 700 bal toplayan 6 nəfərdən biri də İsmayıllı rayonu, 5 saylı orta məktəbin məzunu Lətifov Ağalətif İsak oğludur. Lent.az-ın məlumatına görə, ən böyük arzusu həkim olmaq istəyən Ağalətif yeddinci sinifdə oxuyandan IV ixtisas qrupu üzrə hazırlaşmağa başlayıb: “Əsas məktəbdə hazırlaşmışam. Arada müəllimlərim də kömək edib. Günün çox hissəsini dərs oxumuşam. Axşamlar 9-10-a qədər, bəzən də gecə birə qədər dərs oxuyurdum. Arada 1-2 saatlıq istirahət edirdim. Onda da ya televizora baxırdım, ya da sosial şəbəkələrdə olurdum. Azərbaycan Tibb Universitetinin Müalicə işi fakültəsini seçəcəyəm.”.

A. Lətifov növbəti ildə imtahan verəcək abituriyentlərə öz məsləhətini də verib: “İmtahana qədər çox hazırlaşsınlar, sonra imtahan vaxtı qorxmasınlar. Həyəcan hamıda olur. Amma bilsinlər ki, suallar keçdiyim dərslərdəndi. ATU-a qəbul olmaq istəyən kəs bu sualların cavabını bilməlidir. Suallar elə də çətin deyildi. Sadəcə çox oxumaq lazımdır”.