1239 nəfərdən cəmi 390-ı imtahana girdi

TQDK-nın tədbirlər planına uyğun olaraq martın 17-dən etibarən rezidenturaya qəbul imtahanının birinci mərhələsi – baza fənləri üzrə onlayn sınaq imtahanı aparılır.

TQDK-nın mətbuat xidmətindən Lent.az-a verilən məlumata görə, 29 mart saat 10:00-a olan məlumata görə 1239 namizədin elektron ərizə dolduraraq qeydiyyatdan keçməsinə baxmayaraq, onlayn sınaq imtahanında cəmi 390 namizəd iştirak edib.

Namizədlər Komissiyanın internet saytının müvafiq səhifəsində (http://eservices.tqdk.gov.az/sinaq/) qeydiyyatdan keçərək onlayn rejimdə sınaq imtahanında iştirak edə bilərlər.

Bildirək ki, onlayn sınaq imtahanının məqsədi namizədlərə özlərinə münasib vaxtda baza fənləri üzrə bilik, bacarıq və vərdişlərini qapalı və açıq formalı test tapşırıqları vasitəsilə yoxlamaqda, ümumi hazırlıq səviyyələrini müəyyən etməkdə kömək etməkdir. Bununla da namizədlər həm imtahan texnologiyaları ilə tanış ola bilərlər, həm də imtahana ayrılmış vaxtdan səmərəli istifadə etmək bacarıqlarını inkişaf etdirə bilərlər.