Rəsmi İran APA-ya girişin məhdudlaşdırılmasına izahat verməlidir - Rəşad Məcid
26 dekabr 2023 16:39 (UTC +04:00)

Rəsmi İran APA-ya girişin məhdudlaşdırılmasına izahat verməlidir - Rəşad Məcid

“İran İslam Respublikasında APA-nın saytına girişin məhdudlaşdırılması son aylar iki ölkə arasındakı münasibətlərin istiləşməsi ilə bağlı dinamikaya zidd təmayüldür. Çünki APA ölkəmizin başlıca xəbər yayıcılarındandır. Onun informasiyaları Azərbaycanda da, İranda da ciddi qarşılanır. Ona görə bu məhdudlaşdırma istər-istəməz şübhə yaradır”.

Lent.az xəbər verir ki, bunu APA-ya açıqlamasında Mətbuat Şurasının sədri Rəşad Məcid deyib.

Rəşad Məcid bildirib ki, İranın müvafiq qurumları məsələ barədə düşünməli və duruma təsir göstərməyə çalışmalıdır: “Ümid etmək istərdim ki, biz onlardan adekvat reaksiyanı görəcəyik. Həm də ona görə ki, APA hər zaman tərəfsizliyi və qərəzsizliyi ilə fərqlənib. İran-Azərbaycan münasibətlərinə həssas yanaşması ilə seçilib və media orqanına girişin məhdudlaşdırılması istər-istəməz İranda söz azadlığına münasibətin göstəricisi kimi də qiymətləndirilə bilər. Bu baxımdan da İran dairələrinin, o cümlədən İslam respublikasının ölkəmizdəki səfirliyinin olayı diqqətdə saxlaması, müvafiq izahat verməsi vacibdir. Əlbəttə, daha yaxşı olar ki, İranda APA-nın saytına giriş tezliklə bərpa olunsun”.

# 2136
avatar

Oxşar yazılar