Bioloji qocalmanın əsas səbəblərindən biri iş, ailə həyatı və şəxsi vaxt arasında balansın olmamasıdır. Mütəxəssislər bildirirlər ki, xüsusilə qadınlarda özünü daim başqalarına həsr etmək və şəxsi ehtiyacları arxa plana keçirmək erkən qocalma mexanizmlərini işə sala bilər.
Lent.az xarici mediaya istinadla xəbər verir ki, psixoloqların fikrincə, əsas risk faktorlarından biri mükəmməllik sindromu və həddindən artıq məsuliyyət hissidir. Qadın ailədə bütün yükü üzərinə götürdükdə xroniki stress səviyyəsi artır.
Araşdırmalar göstərir ki, davamlı gərginlik toxumalarda mikroiltihab yaradır, bu isə hüceyrələrin daha tez zədələnməsinə və dərinin vaxtından əvvəl qocalmasına səbəb olur. Eyni zamanda, mənfi emosiyaların idarə olunmaması da təhlükəli hesab olunur və bəzi hallarda 30 yaşdan etibarən bioloji qocalmanı sürətləndirə bilər.
Mütəxəssislər qeyd edir ki, qocalmanın xarici əlamətləri çox vaxt sadə gündəlik vərdişlərdən qaynaqlanan daxili problemlərlə bağlıdır. Araşdırmaya görə, kifayət qədər su qəbul edilməməsi dərinin elastikliyinin azalmasına və orqanizmin daha tez yorulmasına gətirib çıxarır. Fiziki aktivliyin azlığı isə əzələlərin zəifləməsinə və dərinin tonusunu itirməsinə səbəb olur.
Bundan əlavə, şəkərlə zəngin qidalar kollagen liflərinin zədələnməsinə səbəb olan qlikasiya prosesini sürətləndirir, nəticədə dəri solğun və qırışlı görünür. Yuxu çatışmazlığı isə bədənin hüceyrə səviyyəsində bərpa olunmasını əngəlləyir və ümumi qocalma prosesini sürətləndirir.
Mütəxəssislər vurğulayır ki, özünə vaxt ayırmamaq görünməz tükənməyə gətirib çıxarır. Özünə qayğı yalnız kosmetik vasitələrlə məhdudlaşmamalıdır, həm də istirahət, hobbilər və sakitlik üçün vaxt ayırmaq vacibdir. Əks halda, orqanizmin tükənməsi baş verir və bunu heç bir kosmetik vasitə gizlədə bilmir.
Risk faktorları arasında günəş şüaları da xüsusi yer tutur. Günəşdən qorunmadan uzun müddət qaralmağa meyl kollagenin dağılmasına səbəb olur və dəridə dərin qırışların vaxtından əvvəl yaranmasına gətirib çıxarır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
