"Mənim atam qəhrəmandır" - 300-ə yaxın şəhid əmanəti Bakıda - VİDEO

Ucqar kəndlərdən Şəhid ucalığına yüksələnlərin qəhrəmanlığı ilə böyüyən 300-ə yaxın şəhid əmanəti Bakıda “Mənim atam qəhrəmandır” ailəsi olaraq növbəti tədbirdə iştirak ediblər.

Lent.az-ın məlumatına görə, tədbirin təşkilatçılarından olan Cəlal Qurbanov deyib ki, “Mənim atam qəhrəmandır” – “Mənim oğlum qəhrəmandır” layihəsi bir ailədir ki, birliyimizin və bərabərliyimizin təməlində Vətən sevgisi, şəhidlərimizin əmanətlərinə diqqət və qayğı məsuliyyətimiz dayanır.

Parlaq qələbəmizin ucqar kəndlərə yayılan zəfər işığının sahibləri, qəhrəman şəhidlərimizin övladları silsilə tədbirləri ilə daim əmanətlərə xidmət edən “Mənim atam qəhrəmandır” layihəsi ilə növbəti dəfə birlik, bərabərlik, həmrəylik adı altında, sevgini, şəfqəti və diqqəti paylaşmaq üçün biraraya gəldilər. Tədbirdə Mədəniyyət Nazirliyinin, Heydər Əliyev Mərkəzinin, Daxili İşlər Nazirliyinin, Müdafiə Nazirliyinin, Dövlət Turizm Agentliyinin, "Hyatt Ragency Hoteli"nin və "AzFit" şirkətinin dəstəyi, eləcə də “Fire Land Production”nın təşkilatçılığı ilə 2 Avqust tarixində baş tutan tədbirdə Azərbaycanın regionlarından, ucqar kəndlərindən olan 300-ə yaxın şəhid əmanətinin istirahəti və əyləncəsi təşkil edildi.

Heydər Əliyev Mərkəzində tanınmış aparıcı Elvin Mərdanov mərkəzin əməkdaşları adından şəhid ailələrini salamlayaraq onlarla birlikdə mərkəzə ekskursiya etdilər. Heydər Əliyev Mərkəzinin əməkdaşları tərəfindən Azərbaycan xalqının ümummilli lideri Heydər Əliyevin şərəfli ömür yolu, zəngin dövlətçilik irsi, ölkəmizin tərəqqisi uğrunda göstərdiyi çoxsaylı xidmətlərini özündə əks etdirən eksponat və fotostendlər haqqında ətraflı məlumat verildi. Həmçinin dəvət olunmuş nağıl personajları ilə keçirilən əyləncəli saatın ardınca ayrılmış xüsusi avtobuslarla şəhər gəzintisinə çıxarılan əmanət balalarımızı Daxili İşlər Nazirliyinin xidməti polis əməkdaşları müşayət edərək gəzinti boyu onlara olan hörmət və ehtiramlarını sayğı duruşu və öz xidmətləri ilə nümayiş etdirdilər.

Daha sonra öncədən planlaşdırıldığı kimi tədbir "Hyatt Ragency Hoteli"ndə hovuz əyləncəsi, yemək masası və böyük konsert tədbiri ilə davam etdirildi. Artıq 3-cü dəfədir ki, "Hyatt Regency"də baş tutan tədbir hər dəfə fərqliliyi və marağı ilə xüsusi önəm daşıyır. Hovuz ətrafında yayın və əyləncənin dadını çıxaran əmanətlərimizlə gün boyu unudulmaz anlar yaşandı.

Tədbirin rəsmi hissəsi “Şuşam” xorunun ifasında Azərbaycan Himninin sədaları ilə başladı. Sonra tədbirin qonaqları olan Mədəniyyət Nazirliyinin rəsmisi Cahangir Səlimxanov, Müdafiə Nazirliyinin rəsmisi polkovnik Həbib Məmmədov, APA Media qrupun rəhbəri Vüsalə Mahirqızı, “Fire Land Production”nın rəhbəri Cəlal Qurbanov çıxış edərək şəhid övladlarına öz ürək sözlərini, ən səmimi diləklərini bildirdilər.

Cəlal Qurbanov bildirdi ki, can fəda edənlərin sevgisindən, fədakarlığından başlayan Vətənimizin hər bölgəsində şəhidlərimiz var:

““Qarabağ şikəstəsi”nin harayladığı, yallının cuşə gətirdiyi Qarabağımıza qayıdışımızın səbəbkarlarlarına isti qucağımızı, sevgimizi, diqqətimizi ayırmalı, aydın və firavan günlərin onları daim müşayət edəcəyini, tək olmadıqlarını və olmayacaqlarını hiss etdirməliyik. “Mənim atam qəhrəmandır” – “Mənim oğlum qəhrəmandır” layihəsi bir ailədir ki, birliyimizin və bərabərliyimizin təməlində Vətən sevgisi, şəhidlərimizin əmanətlərinə diqqət və qayğı məsuliyyətimiz dayanır. Dövlət, millət aşiqlərinə verəcəyimiz sevgi bizim onların qarşısındakı vicdan borcumuzdur. Canını sipər edənlərin əmanətini daşıyan qəlblərin sızıltısına məlhəm olmalıyıq. Başı dik, alnı açıq olanlara bir ömür boyu yetəcək qürurlu və şərəfli rütbə daşıyırlar. Bizim onlara göstərdiyimiz isə Cənab Prezidentimiz İlham Əliyevin “Şəhid əmanətlərinə xidmət etmək hər bir azərbaycanlının borcudur” ifadəsinin üzərimizə götürdüyümüz məsuliyyətidir. Müqəddəs torpağı düşmən tapdamasın deyən oraya gömülən canlar, bayraq dalğalansın deyən fəda olan oğullar, çəkdiyi ağrı-acıya rəğmən “Vətən sağ olsun” deyən ata-analar, göz yaşlarını ürəyinə axıdaraq “Qəhrəmanım” deyən bacılar var. Şəhid ailələri vətənə sevgini ən fədakar tərzdə gerçəkləşdirənlərdir. Şəhidlərimizə layiq ola bilməyin tək yolu bu Vətənin üzərində onların əmanətlərinə sülhün, sevginin, mərhəmətin səsini yüksəltməkdir. Kədəri, sevinci, xosbəxtliyi bir çörək kimi paylaşdıq, paylaşacağıq. Bir ölərik, min dirilərik”.

Eyni zamanda, 2-ci Qarabağ müharibəsi qaziləri Polad Rzayev, Kamran Baxşızadə, Sabir Dünyamalıyev, İntiqam Əkbərov şəhid övladları ilə öz təəsuratlarını, keçdikləri şərəfli yolu bölüşdülər. Vətən uğrunda 2 ayağını itirmiş XTQ-nin qazisi Polad Rzayev tək qazi deyil, həm də atasını 1-ci Qarabağ müharibəsində itirən şəhid övladlarından biri olduğunu dedi:

“Mənim atamın hisslərimi bölüşməyə gedəcəyim bir məzarı belə yoxdur. Bu gün 2 ayağımı itirsəm də, atamın, sizin atalarınızın və minlərlə azərbaycanlının qisasını aldıq. Vətənə xidmətimlə qürur duyuram”.

Vətən uğrunda 2 gözünü itirmiş qazi Kamran Baxışzadə şəhid övladları qarşısında belə çıxış etdi:

“Sizin atalarınız bizim ən yaxın dostlarımızdır. İtirdiyimiz, ancaq unutmayacağımız səngər dostlarımızdır. Mən gözlərimi öz doğum günümdə itirmişəm. Amma o tarix mənim üçün ən qürurlu tarixdir”.
Daha sonra axşam süfrəsi ətrafına əyləşən şəhid balaları üçün tədbirin musiqili hissəsi baş tutdu. Qeyd edək ki, musiqili proqramda müğənnilərimiz Azad Şabanov, Nadir Rüstəmli, Murad Arif, Mirələm Mirələmov, Zamiq Hüseynov və hər zaman olduğu kimi “Şuşam” xorunun kollektivi iştirak edirdi.

29 şəhid övladının doğum günü tədbir ərəfəsinə təsadüf etdiyindən onlar öz əziz günlərini elə burada qeyd etdilər. Tədbir iştirakçıları bu günü onlar üçün ən yaddaqalan günə çevirdi. Yasamal Rayon İcra Başçısı Elşad Həsənov, millət vəkili Ülvi Quliyev şəhid əmanətlərinin doğum günlərini təbrik edərək, hədiyyələrini təqdim etdilər.

Qeyd edək ki, son 4 il ərzində “Mənim atam qəhrəmandır” və “Mənim oğlum qəhrəmandır” layihələri çərçivəsində Şuşa Şəhər Dövlət Qoruğu, DreamLand Golf Club, Yanardağ Dövlət Tarix-Mədəniyyət və Təbiət Qoruğu, Heydər Əliyev Mərkəzi, Şahdağ İstirahət mərkəzində və s. kimi önəmli məkanlarda 50-dan çox tədbir keçirilib, 3000-ə yaxın şəhid əmanəti bu silsilədən olan tədbirlərə dəvət edilib. Tədbirin sonunda çıxış edən Cəlal Qurbanov daim şəhid ailələrinin yanında olan, 4 ildir bütün layihələrimizdə onlara öz diqqəti və qayğısı ilə seçilən Heydər Əliyev Fondunun İcraçı Direktoru Anar Ələkbərova, Daxili İşlər Nazirliyi, Müdafiə Nazirliyi, Mədəniyyət Nazirliyi və Turizm Agentliyinin əməkdaşlarına, eləcə də incəsənət nümayəndələrinə hər zaman göstərdikləri diqqət, qayğı və hörmətə görə təşəkkürlərini çatdırdılar.