Dünyada İLK ÖLKƏ: fahişələrə məzuniyyət və pensiya veriləcək

Belçika dünyada ilk olaraq seks işçiləri üçün xəstəlik məzuniyyəti, analıq müavinəti və pensiya hüququnu qanuniləşdirib.

Lent.az-ın xarici mediaya istinadla xəbərinə görə, Belçika parlamenti may ayında seks işçilərinə standart sosial müdafiə hüquqları verən qanun qəbul edib. Dekabrın 1-də qanun qüvvəyə minib və belçikalı fahişələr artıq hər hansı digər işdə olduğu kimi eyni əmək müqavilələrinə və hüquqi müdafiəyə malikdirlər.

“The Guardian”ın qeyd etdiyi kimi, Belçika 2022-ci ildə seks sənayesini dekriminallaşdırıb, lakin seks işçilərinə heç bir rəsmi status verməyib. Bu qanunvericilik boşluğu nəticəsində seks işçilərinin qeyri-qanuni istismarına və təqiblərinə səbəb olan bir növ “boz zona” yaranıb. İndi bu boşluq aradan qaldırılıb.

Qanun sosial paket təmin etməklə yanaşı, seks işçilərinə hər hansı müştəriyə xidmət göstərməkdən və ya ona konkret “xidmət” göstərməkdən imtina etmək hüququnu da təmin edir. İndi müştərinin şıltaqlığını yerinə yetirməkdən imtinası işçinin əxlaqsızlıq yuvasından qovulması üçün əsas ola bilməz.

Qanun fahişəxana sahiblərinə də müəyyən məhdudiyyətlər və öhdəliklər qoyur.

Bununla belə, qanun evdən “iş”ə, eləcə də əlaqəli sahələrə – striptiz və pornoqrafiyaya şamil edilmir.