Dostlarla uğurlu tətilin sirləri açıqlandı

Dostlar və ya qohumlarla birlikdə tətilə getmək ilk baxışdan əla fikir kimi görünür. Lakin bəzən belə səyahətlər dostluğun bitməsinə və ya ailədə ciddi mübahisələrin yaranmasına səbəb olur.

Lent.az xarici mediaya istinadən xəbər verir ki, turizm üzrə ixtisaslaşmış ekspertlər birgə istirahətdən sonra dostların düşmənə çevrilməməsi üçün yeddi faydalı məsləhət veriblər.

1. Səyahətdən gözləntilər

Ekspertlər vurğulayırlar ki, səfər planlaşdırılarkən bütün iştirakçılar istirahətdən nə gözlədiklərini əvvəlcədən müzakirə etməlidirlər. Buraya həm tətilin formatı, həm də səyahətin tempi daxildir. Mütəxəssislər xəbərdarlıq edirlər ki, bütün iştirakçıların istirahətlə bağlı gözləntiləri uyğunlaşdırılmasa, sonda kiminsə narazı qalması qaçılmazdır.

2. Maliyyə məsələsi

Dostlar arasında gəlir səviyyəsi və pul xərcləməyə münasibət fərqli ola bilər. Buna görə də səfərin əvvəlində hər kəsin nə qədər vəsait xərcləməyə hazır olduğunu müəyyənləşdirmək vacibdir. Təcrübəli səyahətçilər bu məsələnin planlaşdırmanın ilkin mərhələsində açıq şəkildə müzakirə edilməsini tövsiyə edirlər.

Onların sözlərinə görə, heç kim xərclərə görə narahatlıq keçirməməli və maddi imkanından artıq pul ödəməyə məcbur qalmamalıdır. Digər vacib qayda isə odur ki, qrup üzvlərindən biri hamının əvəzinə hansısa xidmətin pulunu ödəyibsə, digərləri öz paylarını mümkün qədər tez qaytarmalıdırlar.

3. Vəzifələrin bölüşdürülməsi

Bəzən səyahətin bütün planlaşdırılması, məlumatların axtarılması və qrupun gündəlik fəaliyyətinin əlaqələndirilməsi bir nəfərin üzərinə düşür. Bəzi insanlar bu işi həvəslə görsələr də, digərləri üçün əlavə məsuliyyət yorucu ola bilər.

Ekspertlər bildirirlər ki, əgər planlaşdırma prosesində iştirak etmək istəmirsinizsə, o zaman başqalarının hazırladığı plana uyğun hərəkət etməli və sonradan şikayət etməməlisiniz. Eyni zamanda, qrupun hər addımını sərt şəkildə idarə etməyə çalışan insanlarla səyahət etməkdən çəkinmək tövsiyə olunur. İstirahət anlayışı sizinkindən tamamilə fərqlənən insanlarla birgə tətilə getmək də problemlər yarada bilər.

4. Özünüzə vaxt ayırın

Təcrübəli səyahətçilər hesab edirlər ki, qrup halında istirahət zamanı hər kəsin özünə vaxt ayırmaq imkanı olmalıdır. Bütün günü yalnız birgə fəaliyyətlərlə doldurmaq düzgün deyil. Əgər kimsə müəyyən vaxtını tək keçirmək, şəxsi işləri ilə məşğul olmaq və axşam yeməyində yenidən qrupa qoşulmaq istəyirsə, bu, digərlərinə hörmətsizlik kimi qəbul edilməməlidir.

Tətil kifayət qədər baha başa gələn və planlaşdırılması çətin olan istirahət növüdür. Buna görə də hər kəs öz vaxtını istədiyi kimi keçirmək hüququna malik olmalıdır. Bu isə inciklik və anlaşılmazlıq yaratmamalıdır.

5. Yaşayış şəraiti

Səyahət zamanı qalmaq üçün seçilən məkan da tez-tez mübahisələrə səbəb olur. Kim eyni otağı bölüşməyə hazırdır? Kim daha geniş otaq istəyir? Kimin yuxusu həssasdır? Uzunmüddətli səfərlərdə belə xırda görünən məsələlər böyük əhəmiyyət daşıyır.

Birlikdə qalan insanların bir-biri ilə rahat münasibət qurması vacibdir. Bu, yatmaq, təmizlik işləri görmək və yemək hazırlamaq kimi gündəlik məsələlərə də aiddir.

6. Kim nəyin pulunu ödəyəcək?

Qrup üzvləri bütün xərclərin bərabər bölüşdürüləcəyini, yoxsa hər kəsin yalnız öz xərclərini ödəyəcəyini əvvəlcədən razılaşdırmalıdırlar. Bu məsələ xüsusilə restoranlarda aktuallaşır. Məsələn, kimsə bahalı yeməklər və spirtli içkilər sifariş edə bilər, digərləri isə daha sadə seçimlərə üstünlük verə bilərlər.

Eyni vəziyyət yaşayış yerinin seçilməsində də yaranır. Bəzi insanlar sadə, ortaq mənzildə qalmağa razı olduğu halda, digərləri ayrıca və dəbdəbəli otaq istəyirlər. Təcrübəli səyahətçilər gündəlik xərclərlə bağlı maraqlı üsul da təklif edirlər. Belə ki, yemək, içki və digər kiçik məişət xərcləri üçün ümumi büdcə yaratmaq olar. Bu zaman hər kəs həmin büdcəyə eyni məbləğdə pul əlavə edir.

7. Ünsiyyət uğurun əsas şərtidir

Ekspertlər turistlərə birgə istirahətlə bağlı bütün mübahisəli məsələləri əvvəlcədən müzakirə etməyi tövsiyə edirlər. Bu, lazımsız münaqişələrin və xoşagəlməz vəziyyətlərin qarşısını almağa kömək edir.

Əgər sizi narahat edən, razılaşmadığınız və ya əlavə sual doğuran hər hansı məsələ varsa, bunu dərhal bildirmək lazımdır. Mütəxəssislərin fikrincə, açıq ünsiyyət, qarşılıqlı hörmət və düzgün planlaşdırma dostlarla və ailə üzvləri ilə uğurlu istirahətin əsas şərtləridir.