"Delta" ştammı ilə bağlı daha bir FAKT : "3 günə ..."

“Delta” ştammına yoluxma hallarına 12-20 yaş aralığında olan insanlarda daha çox rast gəlinir".

Bu sözləri Lent.az-a açıqlamasında tibb elmləri doktoru, professor Adil Qeybulla deyib. O bildirib ki, ilk dəfə Hindistanda aşkarlanan virus növü həm də bu səbəbdən "Hindistan" ştammı adlanır:

"Yeni növün gizli dövrü artıq 7 günə deyil, 3 günə bəlli olur. Bu o deməkdir ki, "Delta" ştammı daha tez aşkar olunur. Əlamətləri isə halsızlıq, yüksək temperatur, öskürək, boğaz ağrısı, miqren tipli baş ağrıları, burnun dolması iltihabıdır".

A.Qeybulla qeyd edib ki, yeni növ ştamm artıq 98 ölkədə yayılıb:

"Yayılmaqda davam edir. Ən dəhşətli yoluxma göstəricisi isə Hindistandadır. Orada artıq 400 mindən çox şəxs bununla bağlı vəfat edib. Hazırda dünyada dördüncü dalğanın başlamasının qarşısını almaq üçün işlər gedir, kütləvi peyvəndləmə prosesi aparılır və s.

Artıq Azərbaycanı əhatə edən Rusiya, Türkiyə və Gürcüstanda adıçəkilən ştamm növü aşkarlanıb. Buna görə də Azərbaycan vəziyyəti nəzərə almalı və karantin tədbirlərinə hazırlıqlı olmalıdır".

Professor əlavə edib ki, karantin qaydalarının sərtləşməsi ilə bağlı tədbirlər dünyada da, Azərbaycanda da epidemioloji vəziyyətdən asılı olacaq.