TQDK orta ixtisas təhsili müəssisələrinə qəbul olanlara xəbərdarlıq etdi

Tələbə Qəbulu üzrə Dövlət Komissiyası (TQDK) ümumi orta təhsil bazasında (9 illik) orta ixtisas təhsili müəssisələrinə qəbul olan abituriyentlərə xəbərdarlıq edib.
TQDK-nın mətbuat xidmətindən Lent.az-a verilən məlumata görə, qəbul olanlar sentyabrın 6-dan 14-dək (şənbə və bazar günləri istisna olmaqla) sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər.
Müəyyən olunmuş müddətdə qeydiyyatdan keçməmək abituriyentin müvafiq ixtisasa yerləşdirilməsindən imtina etməsi kimi qiymətləndiriləcək və onun qəbul haqqında əmri orta ixtisas məktəbinə göndərilməyəcək.
Qeyd edək ki, TQDK avqustun 28-də cari tədris ili üçün ümumi orta təhsil bazasında (9 illik) orta ixtisas təhsili müəssisələrinə qəbul imtahanı keçirib. Cari tədris ili üçün 9 illik (ümumi) orta təhsil bazasında ayrılmış 9642 plan yerinə 31251 abituriyent sənəd verib. Onlardan 30768 nəfəri imtahanda iştirak etmiş, 442 abituriyent imtahana gəlməyib. Nəticələr bu gün saat 16:30-dan etibarən TQDK-nın rəsmi internet səhifəsində yerləşdirilib. Abituriyentlərdən 55 nəfəri imtahan qaydalarına zidd hərəkətlərə yol verdiklərinə görə, imtahandan xaric olunmuş və nəticələri ləğv olunub. Abituriyentlərdən 9227 nəfəri orta ixtisas təhsili müəssisələrinə qəbul olub.