Həmkarlar İttifaqı 3 ildə 3600 nəfəri pulsuz istirahətə göndərib

“Son üç il ərzində sanatoriya-kurort və istirahət ocaqlarında 56 mindən çox əməkçi və onların ailə üzvlərinin birgə istirahəti təşkil edilib. 3600 nəfərdən çox işçi yollayışlardan pulsuz istifadə edib”.

Lent.az-ın xəbərinə görə, bunu yap.org.az saytına müsahibəsində Azərbaycan Həmkarlar İttifaqları Konfederasiyasının prezidenti Səttar Mehbalıyev deyib.

O, daxili imkanlar hesabına sanatoriya-kurort və istirahət müəssisələrində 90000 nəfərə yaxın əməkçi və onların ailə üzvlərinin müalicə və istirahətinin təmin olunduğunu qeyd edib: “2010-cu ildə 29000 nəfər sanatoriya-kurort və istirahət yollayışları ilə təmin edilib ki, bu da 2009-cu illə müqayisədə təqribən 2500 nəfər çoxdur. Bunların sırasında xarici ölkələrin vətəndaşları da kifayət qədərdir”.

Konfederasiya prezidenti deyib ki, Azərbaycan Həmkarlar İttifaqları işçilərin istirahətinin təşkili üçün hər il təqribən 11 milyon manat məbləğində vəsait xərcləyir: “Həmkarlar ittifaqı təşkilatlarının daxili imkanları hesabına təşkil olunmuş sanatoriya-kurort müalicəsi və istirahət nəzərə almaqla bu rəqəm 13 milyon manata yaxın olunub”.