Mətbuat Şurası “Vesti.az” xəbər portalının baş direktoru Araz Zeynalovu təbrik edib

“APA Group”a daxil olan “Vesti.az” xəbər portalının baş direktoru Araz Zeynalovu 50 illik yubileyi münasibəti ilə təbrik edib. APA-nın xəbərinə görə, MŞ-nin saytında yerləşdirilən təbrikdə Araz Zeynalovun Azərbaycan mətbuatındakı xidmətləri qeyd olunub: “Hidayət Zeynalov və Məryəm Həsənzadə kimi görkəmli jurnalistlərin ailəsində boya-başa çatmaq peşə seçiminizə təsirsiz ötüşməyib. Lakin diqqətə layiq cəhət varislik ənənəsinə ləyaqətinizin öz zəhmətiniz, öz imzanızla qazanılmasındadır. 50 yaşınızın tamamında bu mənada yaşanılan illərinizin iftixarla yada salınması üçün kifayət qədər misalların mövcudluğu sevinc doğurur. Sizi jurnalistika ilə bağlayan müddət 30 ilə yaxındır. Mənsub olduğunuz ailəyə və ilk yazılarınıza nəzər salanda adama elə gəlir ki, bunun təməlinin daha əvvəllərdən hesablanması məntiqidir. Bakı Dövlət Universitetinin jurnalistika fakültəsini bitirdikdən sonra 1983-1996-cı illərdə dərc olunan oxunaqlı yazılarınızın “Azərbaycan gəncləri” qəzetinin səhifələrində əbədi izi qalıb. Baş redaktor kimi təcrübəniz 1996-2000-ci illərdə iki dildə nəşr edilən “Panorama” qəzetinin də populyarlaşmasında mühüm rol oynayıb. 2009-cu ilin mart ayından eyni vəzifəni daşıdığınız “Vesti.az” xəbər portalı da belə yüksək imicə malikdir”.

Təbrikdə daha sonra deyilir ki, “Vesti.az” xəbər portalı rus dilində fəaliyyət göstərsə də, jurnalist ictimaiyyətinin səciyyələndirdiyi kimi azərbaycanlı düşüncəsi ilə işləyir: “Çünki Sizin təbirinizcə desək, “jurnalistikanın dili yoxdur, dərki, düşüncəsi, mühakimələri var””.