Məktəblərin mühafizəsi üçün 6 milyon manat

Bu vəsaitlə yalnız Bakıda və rayon mərkəzlərindəki təhsil müəssisələri mühafizə olunacaq

Təhsil müəssisələrində təhlükəsizlik tədbirlərinin gücləndirilməsi məqsədilə bu il büdcədə 6 milyon manat nəzərdə tutulub. Həmin vəsait əməkhaqqı şəklində Təhsil Nazirliyinin müəyyən etdiyi təhsil ocaqlarında təhlükəsizliyi qoruyacaq mühafizə xidməti idarələrinə ödəniləcək.

Təhsil Nazirliyindən Lent.az-a bildiriblər ki, artıq məktəblərdə mühafizə tədbirlərinin dövlət orqanlarına tapşırılması barədə qərar qəbul olunub. Qərara görə, Bakıda və rayon mərkəzlərində, əhalinin sıx yaşadığı ərazilərdə yerləşən bütün təhsil müəssisələrində mühafizə xidməti fəaliyyət göstərəcək. Həmçinin özəl ali məktəblərin mühafizəsini də dövlət özü təşkil edəcək.

Nazirlikdə bildirirlər ki, artıq paytaxtda və iri şəhərlərdə yerləşən təhsil müəssisələrinin mühafizəsi üçün hazırlıq işlərinə başlanıb. Belə ki, Daxili İşlər Nazirliyinin Baş Mühafizə İdarəsi yerlərdə mühafizə işinin qurulması imkanlarını araşdıraraq, müvafiq tədbirlər görür.

Xatırladaq ki, hazırda Təhsil Nazirliyinin tabeliyində 7 mindən çox ali və orta təhsil müəssisəsi fəaliyyət göstərir. Həmin məktəblərdə mühafizə tədbirlərinin görülməsi üçün ayrılmış vəsait isə cəmi 6 milyon manatdır. Elə bu səbəbdən də kənd məktəblərinin mühafizəsi hələlik nəzərdə tutulmur.
Elxan SALAHOV